მამუკელაშვილმა მხოლოდ 4 ქულა ჩააგდო | ტორონტო ბრუკლინთან დამარცხდა

სანდრო მამუკელაშვილის „ტორონტო რეპტორსმა“ ზედიზედ მეორე შეხვედრა წააგო. კანადელები აღმოსავლეთ კონფერენციის აუტსაიდერს, „ბრუკლინ ნეთსს“, სტუმრად დაუპირისპირდნენ და 81:96 დამარცხდნენ.

მამუკელაშვილმა პარკეტზე 19 წუთი და 57 წამი გაატარა. ამ დროის განმავლობაში სანდროს 4 ქულა, 5 მოხსნა და 1 ჩაჭრა ჰქონდა. „მამუმ“ სამიდან ერთი სამქულიანი ჩააგდო, ერთი ორქულიანი გააფუჭა და ორიდან ერთი საჯარიმო გამოიყენა. ქართველ კალათბურთელს 3 მოხსნა მეტოქის ფარზე ჰქონდა, ბურთი 3-ჯერ დაკარგა და ამდენივე პერსონალური ჯარიმა მიიღო.

„ტორონტოს“ შემადგენლობაში ყველაზე მეტი — 19 ქულა — ბრენდონ ინგრემმა ჩააგდო. იმანუელ ქუიკლიმ 17 ქულა და 10 შედეგიანი გადაცემა მიითვალა. „ნეთსის“ რიგებში საუკეთესო მაიკლ პორტერ ჯუნიორი იყო — 24 ქულა, 11 მოხსნა და 5 შედეგიანი გადაცემა. ნოა კლაუნის ანგარიშზე 19 ქულა და 9 მოხსნა იყო.

ცნობისთვის, „რეპტორსს“ 17 მოგება და 13 წაგება აქვს და აღმოსავლეთ კონფერენციაში მეექვსე ადგილზე იმყოფება. მამუკელაშვილის გუნდი მომდევნო შეხვედრას 24 დეკემბერს გამართავს და „მაიამი ჰიტს“ დაუპირისპირდება.