ჯიკიჩი: ბოლომდე თამაში ყველაზე ჭკვიანური გადაწყვეტილება არ იქნებოდა

ევრობასკეტზე საქართველოს ეროვნულმა ნაკრებმა ზედიზედ მეორე მატჩი დათმო, ესპანეთთან სენსაციური გამარჯვებისა და იტალიასთან წაგების შემდეგ ალეკსანდარ ჯიკიჩის გუნდი საბერძნეთთან დამარცხდა - 53-94.

მატჩის შემდეგ საქართველოს ეროვნული ნაკრების მთავარმა მწვრთნელმა ალეკსანდარ ჯიკიჩმა განაცხადა, რომ გუნდმა აქცენტი ბოლო ორ ტურზე გააკეთა.

ჯიკიჩი: „იტალიასთან მატჩის შემდეგ ორი გზა გვქონდა, ან ბოლომდე უნდა გვეთამაშა და 100 პროცენტით დავხარჯულიყავით ან ტრავმები აგვეცილებინა და ბოლო ორი თამაშისთვის ჯანმრთელი მოთამაშეები გვეყოლებოდა. ჩვენ მეორე ვარიანტი ავირჩიეთ.  ჩემი გადაწყვეტილება იყო და კარგად ვიცით, რა არის ჩვენი მიზანი

ასე თამაში არ მომწონს, მოთამაშეებსაც არ მოსწონთ. ასე თამაში არ შეგვეფერება, მაგრამ დღეს ბოლომდე ბრძოლა არ იქნებოდა ყველაზე ჭკვიანური გადაწყვეტილება. ჩვენი პრობლემაებიდან გამომდინარე, შეიძლებოდა, კიდევ ორ ან სამ კალათბურთელს ტრავმა მიეღო.

შემადგენლობაში არ გვაქვს სიღრმე, რომ 7-დღიან მონაკვეთში ხუთი მატჩი ჩავატაროთ და ყველა შეხვედრაში 100 პროცენტით დავიხარჯოთ. შესაბამისი ხარისხი და სიღრმე არ გვაქვს. ეს არჩევანი გავაკეთე და შესაძლოა ზოგი სხვაგვარად ფიქრობს, თუმცა ეს ნორმალურია, ყველას თავისი აზრი აქვს''.

ჯიკიჩი თორნიკე შენგელიას მდგომარეობაზე: „თქვენდამი პატივისცემის მიუხედავად ამ კითხვაზე პასუხს არ გავცემ. ბოლო ორ შეხვედრაში შენგელია ითამაშებს. როგორც ვთქვი, ჩემთვის პრიორიტეტი ბოლო ორი მატჩისთვის მოთამაშეების ჯანმრთელობის შენარჩუნება იყო.

შეგვეძლო 100 პროცენტით დავხარჯულიყავით, მაგრამ არ არსებობს გარანტია, რომ საბერძნეთთან მოვიგებდით. ამის გარანტიას ვინ მომცემს? საუკეთესო შემადგენლობითაც რომ გვეთამაშა, ფავორიტი საბერძნეთის ნაკრები იქნებოდა''.

მე-4 ტურში საქართველოს ნაკრები ტურნირის მასპინძელ კვიპროსს დაუპირისპირდება (2 სექტემბერი, 19:15), მე-5 ტურში ჩვენი გუნდის მეტოქე ბოსნია და ჰერცეგოვინას ნაკრები იქნება (4 სექტემბერი, 16:00). ჯგუფი 6-გუნდიანია და თითოეული ჯგუფიდან ევრობასკეტზე თამაშს საუკეთესო 4 ნაკრები გააგრძელებს, 2 გუნდი ტურნირს დაემშვიდობება.