ქართველი ფეხბურთელი სერია C-ში | რავენამ ლორთქიფანიძეს ახალი კონტრაქტი გაუფორმა

იტალიურმა კლუბმა „რავენამ’’, რომელიც გასულ სეზონში სერია C-ში აღზევდა, 24 წლის ქართველ ფეხბურთელ დავით ლორთქიფანიძესთან ახალი ერთწლიანი კონტრაქტი გააფორმა.ინფორმაცია კლუბმა ოფიციალურად დაადასტურა.

„რავენას’’ ოფიციალურ გვერდზე ვკითხულობთ: „ქართველმა ნახევარმცველმა დიდი დინამიზმითა და თავგანწირული სულისკვეთებით გუნდში ადგილი და ნდობა მოიპოვა, მრავალმხრივი მოთამაშეა, რომელსაც ნახევარდაცვაში ბალანსის შექმნა შეუძლია’’.

გასულ სეზონში სერია D-ს რეგულარულ ჩემპიონატში, სერია D-ს ფლეი-ოფსა და სერია D-ს თასზე საერთო ჯამში 31 მატჩი ჩაატარა, მის აქტივში 6 გოლია. ერთი გოლი მან სერია D-ს ფლეი-ოფის ნახევარფინალში „პისტოიზეს’’ (ყოფილ გუნდს) გაუტანა. Transfermrkt-ის მონაცემებით, 6 გოლის გარდა 3 საგოლე პასი შეასრულა. 31 მატჩში 9 საგოლე მოქმედება საკმაოდ კარგი შედეგია.

ლორთქიფანიძეს საქართველოს 17 და 19-წლამდე ნაკრებებში უთამაშია. ასაკობრივ ნაკრებებში ხვიჩა კვარაცხელიას, ზურიკო დავითაშვილის, ნიკა გაგნიძის, ირაკლი აზაროვის, გიორგი გულიაშვილის, ივა გელაშვილის, შოთა ნონიკაშვილის თანაგუნდელი იყო (ეროვნული ნაკრების მოქმედი მოთამაშეები ჩამოვთვალე).

დავით ლორთქიფანიძის უმცროსი ძმა დაჩი „კრემონეზეს'' ფეხბურთელია.