ქვილითაიას მორიგი გოლი - აპოელის დამაჯერებელი გამარჯვება
კვიპროსის ჩემპიონატის მორიგ ტურში „აპოელმა“ „სალამისს“ უმასპინძლა და მარტივად 3:0 დაამარცხა. გამარჯვებაში კი თავისი წვლილი გიორგი ქვილითაიამ შეიტანა.
გულშემატკივრებმა საკმაოდ მხიარული დაპირისპირება იხილეს. აღსანიშნავია, რომ სტუმართა გუნდი 22-ე წუთიდან 10 კაცით დარჩა და შეტევაში ბევრი არაფერი გამოსდიოდა.
ანგარიში 35-ე წუთზე დონისმა გახსნა და პირველი ნახევარი 1:0 დასრულდა. მეორე ტაიმში, მასპინძლები კიდევ უფრო მეტად გააქტიურდნენ. 55-ე წუთზე სხვაობა ორამდე სწორედ ქვილითაიამ გაზარდა და ფაქტობრივად მატჩის ბედიც გადაწყვიტა.
შეხვედრაში წერტილი „მანჩესტერ იუნაიტედის“ ყოფილმა ფეხბურთელმა ფედერიკო მაკედამ დასვა. იტალიელმა 63-ე წუთზე გაისროლა და საბოლოო ანგარიში 3:0 დააფიქსირა. ცნობისთვის, ქართველმა ფეხბურთელმა მიმდინარე სეზონში ყველა ტურნირზე ერთად მეშვიდე გოლი გაიტანა.