ნიუკასლის თავკაცს იდეალურ ვარიანტად მიაჩნია - ვინ არიან ხვიჩას მსურველები

ბენ ჯეიკობსი ბრიტანელი სატრანსფერო ექსპერტია და ცნობილ ვებგვერდზე, Caughtoffside.com-ზე „ნაპოლის“ ქართველი ფეხბურთელის, ხვიჩა კვარაცხელიას მომავალზე ისაუბრა. ჯეიკობსის მიხედვით, „კვარას“ მიმართ ინტერესს ევროპული ფეხბურთის გრანდები იჩენენ და მათ „პარტენოპეის“ გარემარბის შესაძენად სერიოზული თანხის გაღება მოუწევთ.

„მანჩესტერ სიტი და ნიუკასლი პრემიერ ლიგის ის ორი კლუბია, რომლებიც კვარაცხელიას აქტიურად აკვირდებიან. ხვიჩას გარშემო განვითარებულ მოვლენებს თვალს პარი სენ-ჟერმენი და რეალიც ადევნებენ. კაჭკაჭების თავკაცი, ედი ჰაუ კვარაცხელიას თავისი გუნდისთვის იდეალურ ფეხბურთელად მიიჩნევს, რადგან ის სწრაფი და ტექნიკურია და 4-3-3 ტაქტიკაში ბუნებრივად ჯდება.

ნაპოლის მისი გასხვისება არ უნდა. ყველაფერი ასე მარტივადაა და პარტენოპეის არ აქვს სურვილი, ზაფხულში ოსიმენი და კვარაცხელია დაკარგოს. ის ინფორმაცია, რომ კვარას შეძენა 50 მილიონ გირვანქა სტერლინგად იქნება შესაძლებელი, მითია. არ გამიკვირდება, რომ ნაპოლიმ მის სანაცვლოდ ამ თანხაზე მინიმუმ 2-ჯერ მეტი მოითხოვოს. ორი აზრი არაა, რომ ზაფხულში ბევრი ვარიანტი ექნება, მაგრამ ნაპოლი მისთვის იდეალური კლუბია“, - წერს ბენ ჯეიკობსი.

შეგახსენებთ, რომ 22 წლის კვარაცხელიამ, რომელიც სერია A-ში სადებიუტო სეზონს ატარებს, იტალიის ჩემპიონატში 20 შეხვედრაში 10 გოლი შეაგდო და 9 საგოლე პასი შეასრულა. გარდა ამისა, ჩემპიონთა ლიგის ექვს შეხვედრაში 2 გოლითა და 4 საგოლე პასით გამოიჩინა თავი.