დი მარციო: „რონალდუს ევროპაში დარჩენა სურს, თუმცა არავინ იწვევს“

ჯანლუკა დი მარციოს ინფორმაციით, კრიშტიანუ რონალდუს ევროპაში დარჩენა სურს, თუმცა ევროპული კლუბები 37 წლის ფეხბურთელის გადაბირებით არ ინტერესდებიან. „მან. იუნაიტედიდან“ წამოსვლის შემდეგ პორტუგალიელმა ფეხბურთელმა ერთადერთი წინადადება „ალ-ნასრიდან“ მიიღო. თუ რონალდუ კარიერას „ალ-ნასრში“ გააგრძელებს, 2,5-წლიან პერიოდში 200 მილიონ ევროს მიიღებს.

რონალდუს დაბრუნება ლისაბონის „სპორტინგს“ სურს, თუმცა ფინანსური კუთხით „ალ-ნასრისთან“ კონკურენციაში შესვლას ვერ შეძლებს.

ჯანლუკა დი მარციოს ინფორმაციით, გასულ ზაფხულში რონალდუს „ნიუკასლიდან“ დაურეკეს, თუმცა მხარეებს შორის მოლაპარაკება არ გაგრძელებულა.

ბრიტანული მედია განსხვავებულ ინფორმაციას ავრცელებს, Star-ისა და Sun-ის ინფორმაციით, „ლურჯებმა“ პოზიცია შეცვალეს და ამ მომენტისთვის, მზად არიან, რონალდუ გაიფორმონ. ეს არმანდო ბროიას ტრავმამ განაპირობა. ამ უკანასკნელმა სერიოზული დაზიანება მიიღო და დიდი ხნის გამოტოვება მოუწევს, რის გამოც, „ჩელსის“ ცენტრალური თავდამსხმელი დასჭირდა.

შეგახსენებთ, ნოემბერში, კრიშტიანუ რონალდუმ „მან. იუნაიტედთან“ კონტრაქტი გაწყვიტა და მას შემდეგ თავისუფალი აგენტია.