წილისყრაში არ გაუმართლა - დუბაიში ბასილაშვილის მეტოქე ცნობილია
ნიკოლოზ ბასილაშვილი დოჰას ტურნირის ფინალში მარცხის შემდეგ არაბთა გაერთიანებულ ემირატებში საერთაშორისო ტურნირში (DUTY FREE TENNIS CHAMPIONSHIPS) მიიღებს მონაწილეობას. დუბაიში გასამართი ტურნირის საპრიზო ფონდი 2 949 665 აშშ დოლარია.
ბასილაშვილისთვის ტურნირი საკმაოდ რთული შეხვედრით დაიწყება, პირველ წრეში მისი მეტოქე ფელიქს ოჟე-ალიასიმია, რომელიც ტურნირზე მესამე ნომრადაა განთესილი. კანადელი ქართველს კარიერაში სამჯერ შეხვდა და სამივე შეხვედრა მოუგო, 2019 წელს მაიამისა და ლიონში, 2020 წელს კი - ცინცინატიში.
აღსანიშნავია, რომ ტურნირზე პირველ ნომრად სერბი ნოვაკ ჯოკოვიჩია განთესილი.
შეგახსენებთ, 2022 წლის დოჰას 250-ქულიანი კატეგორიის ფინალში ნიკოლოზ ბასილაშვილი ტიტულის დასაცავად რობერტო ბაუტისტა აგუტის დაუპირისპირდა და სამწუხაროდ ორ სეტში 3:6 4:6 დამარცხდა.
