"საქართველო რუსეთი არ არის - მინდა, მივმართო იმ ადამიანს... შემდეგში შეცდომა აღარ დაუშვათ"
იაპონიაში მიმდინარე მსოფლიო ჩემპიონატზე საქართველოს მორაგბეთა ნაკრებმა D ჯგუფის მეორე შეხვედრა გამართა და ურუგვაის 33:7 სძლია, 5 ლელო დადო და ბონუს ქულაც მოიპოვა!
52-ე წუთზე საქართველოს ნაკრებმა ისტორიული ლელო დადო და მისი ავტორი ჯაბა ბრეგვაძე გახდა. მსოფლიო ჩემპიონატზე ქართული რაგბის ისტორიაში ერთ შეხვედრაში 4 ლელო აქამდე არასდროს დადებულა.
მატჩის შემდგომ პრესკონფერენციაზე ბრეგვაძემ და მილტონ ჰეიგმა მომენტით ისარგებლეს და შეხვედრის შემდგომ მომხდარ უსიამოვნო ფაქტზე ისაუბრეს.
როდესაც მატჩი დასრულდა, სტადიონზე შეცდომით რუსული სიმღერა ჩართეს...
ჯაბა ბრეგვაძე: „მინდა, რომ ამ მომენტით ვისარგებლო და იმ ადამიანს მივმართო, რომელმაც რუსული სიმღერა ჩართო - გთხოვთ შემდეგ ჯერზე შეცდომა აღარ დაუშვათ“.
მილტონ ჰეიგი: „მატჩის შემდეგ ჩართული სიმღერა რუსული იყო. ჩვენ გვინდა, რომ გარკვევით ვთქვათ რუსეთი საქართველო არ არის და საქართველო რუსეთი არ არის. ჩვენ განსხვავებული ენები გვაქვს, განსხვავებული კულტურა და ყველაფერი განსხვავებული გვაქვს“.
