ღირსეული ბრძოლა და სამწუხარო წაგება ჰაკუჰოსთან!
ლევან გორგაძისთვის "ჰარუ ბაშო" სერიოზულ გამოცდად იქცა. ტრავმის თანხლებით მოასპარეზე ქართველ სუმოისტს დადებითი ბალანსის დაფიქსირება აუცილებლად სჭირდება, რათა ოძეკის წოდება შეინარჩუნოს. ბაშოს 11 დღის შემდეგ, ლევანს ბალანსი 6:5-ზე ჰქონდა.
ტოჩინოშინის დღევანდელი მეტოქე კი სუმოს ცოცხალი ლეგენდა, ჰაკუჰო შო გახლდათ, რომელსაც მაკუუჩი დივიზიონში 41 ბაშო აქვს მოგებული და ამით, ყველა დროის რეკორდსმენია. ქართველმა რიკიშიმ მას ისტორიაში ერთადერთხელ მოუგო და ეს გასულ სეზონში მოხდა.
დღევანდელი ორთაბრძოლა საკმაოდ დაძაბული გამოდგა და მისი დიდი ნაწილი თანაბრად წარიმართა, თუმცა გადამწყვეტ მომენტში მაინც მონღოლმა იძალა და "ტოჩი" დოჰიოდან იორიკირის ილეთით გაიყვანა. ჰაკუჰო დაუმარცხებელ სვლას აგრძელებს და ბალანსი 12:0-ზე გაუხდა.
ჩვენი თანამემამულის მდგომარეობა კი უკვე საკმაოდ რთულია, მან ზედიზედ მე-3 მარცხი იწვნია, რის გამოც ოძეკის წოდება სერიოზულ საფრთხეშია და დარჩენილი 3-დან 2 ორთაბრძოლის მოგება სჭირდება.
ლევანს ხვალაც მძიმე ბრძოლა ელის და კიდევ ერთ იოკოძუნასთან, კაკურიუსთან დაპირისპირება მოუწევს, რომელმაც დღეს მორიგი, რიგით მე-3 ორთაბრძოლა წააგო და ჩემპიონობის შანსი პრაქტიკულად დაკარგა. ჰაკუჰოს მსგავსად, კაკურიუც მონღოლია, თუმცა გაცილებით ნაკლებად წარმატებული, მას აქტივში 5 ბაშოს ჩემპიონობა აქვს.
