„უკვე მენატრება თეთრ-ლურჯი მაისური“ - მესის პოსტი სოციალურ ქსელში

ლიონელ მესიმ არგენტინის ეროვნული ნაკრებიდან წასვლის შემდეგ, სოციალურ ქსელში გამოსამშვიდობებელი პოსტი გამოაქვეყნა.

გასულ ღამეს 39 წლის ლეომ ეროვნული გუნდის შემადგენლობაში თავისი ბოლო მატჩი ჩაატარა. არგენტინამ ამხანაგურ შეხვედრაში ბენინი 3:0 დაამარცხა, მესიმ კი 1 გოლი გაიტანა და 2 საგოლე გადაცემა შეასრულა.

„გუშინ ჩემი ბოლო მატჩი იყო და უკვე მენატრება თეთრ-ლურჯი მაისური. ვიცი, რომ სწორ გადაწყვეტილებას ვიღებ. ეს იყო წარმოუდგენელი გზა, სავსე სიხარულით, მაგრამ ასევე რამდენიმე სევდიანი მომენტით. თუმცა ზუსტად ვიცი, რომ თითოეულ ჩემს მიერ გადადგმულ ნაბიჯად ღირდა.

და კიდევ ბევრი რამის თქმა მინდა. შეუძლებელია რამდენიმე სიტყვით ან ერთი პოსტით გამოვხატო ყველაფერი, რასაც ვგრძნობ. ეს გზა შეუძლებელი იქნებოდა ჩემი ოჯახის გარეშე, რომელიც ყოველთვის ჩემს გვერდით იყო და მხარს მიჭერდა, განსაკუთრებით იმ რთულ მომენტებში, როცა ეს ყველაზე მეტად მჭირდებოდა.

ასევე შეუცვლელნი იყვნენ ჩემი მეგობრები, თანაგუნდელები და მწვრთნელები, რომლებთანაც მუშაობა მომიწია, მათ სამწვრთნელო შტაბებთან ერთად. არ მინდა დავივიწყო დიეგო (მარადონა), რომელიც დაეხმარა ჩვენს ქვეყანას დაეკავებინა ის ადგილი, რომელსაც იმსახურებდა და რომელიც, როგორც ყოველთვის ვამბობ, გვეხმარებოდა ყოველ ნაბიჯზე, იყო ჩვენს გვერდით, ახლა კი - ზეციდან.

მადლობა კლუბებს, რომლებშიც მითამაშია, იმისთვის, რომ ყოველთვის პატივს სცემდნენ ჩემს გრძნობებს და მაძლევდნენ საშუალებას მთლიანად მიმეძღვნა თავი ნაკრებისთვის, როცა მისი მაისურის მორგების დრო მოდიოდა. და, რა თქმა უნდა, მადლობა ღმერთს: მისი წინამძღოლობისა და ნების გარეშე, ჩვენ ვერც კი ვიოცნებებდით ამ მომენტამდე მისვლაზე.

მადლობელი ვარ. ძალიან მიყვარხართ, მომენატრებით და ყოველთვის მადლობას გეტყვით იმისთვის, რომ ჩვენს გვერდით, ჩემს გვერდით იყავით“,

- დაწერა მესიმ.