დე ლაურენტისს 2019 წელს ნათქვამი გაუხსენეს | ნაპოლის ისტორიული ფიასკო
იტალიის თასის მერვედფინალში, ხვიჩა კვარაცხელიას „ნაპოლი“ გიორგი კვერნაძის „ფროზინონეს“ დაუპირისპირდა. „პარტენოპეიმ“ სრული ფიასკო განიცადა და საკუთარ კედლებში გამართულ შეხვედრაში 0:4 განადგურდა.
ნეაპოლელთა კრახი ისტორიული ანტირეკორდი აღმოჩნდა. OptaPaolo-ს ინფორმაციით, იტალიის თასის ეგიდით, „ნაპოლის“ საკუთარ კედლებში 4 ან უფრო მეტი ბურთით 1958 წლის შემდეგ არ წაუგია. მაშინ „პარტენოპეი“ „ლაციოსთან“ იმავე ანგარიშით დამარცხდა - 0:4.
„ფროზინონესთან“ წაგების შემდეგ, „კვარას“ გუნდის პრეზიდენტს, აურელიო დე ლაურენტისს 2019 წელს გაკეთებული განცხადება გაუხსენეს. მაშინ ნეაპოლელთა პირველმა პირმა „კანარინი“ გააკრიტიკა და განაცხადა, რომ მისნაირი გუნდი სერია A-ში არ უნდა თამაშობდეს.
„რატომ არის ფროზინონე სერია A-ში? ისინი გულშემატკივრებს ვერ იზიდავენ, ვერც ინტერესს აჩენენ და მათი თამაშის გაშუქება ტელევიზიებსაც არ სურთ. სერია A-ში გადმოდიან, კონკურენციას ვერავის უწევენ და შემდეგ უმაღლესი დივიზიონიდან ვარდებიან. თუ წინააღმდეგობას ვერავის უწევენ, ჯარიმა უნდა გადაიხადონ და ფული არ უნდა მიიღონ“.
ცნობისთვის, ამ გამარჯვების შედეგად, „ფროზინონემ“ იტალიის თასის 1/4 ფინალური ეტაპის საგზური მოიპოვა, „ნაპოლი“ კი გათამაშებას გამოეთიშა. გიორგი კვერნაძის გუნდის მეტოქე „იუვენტუსსა“ და „სალერნიტანას“ შორის გამარჯვებული იქნება.