ფოთი დამარცხებულია - ბათუმის დინამო საქართველოს თასის ფინალშია

საქართველოს დავით ყიფიანის სახელობის თასზე ნახევარფინალური დაპირისპირება გაიმართა. ფოთის „კოლხეთმა“ ბათუმის „დინამოს“ უმასპინძლა. აჭარლებმა 3:1 მოიგეს და ფინალში გავიდნენ.

მატჩი საკმაოდ დაძაბულად წარიმართა. პირველი ტაიმი ფრედ 0:0 დასრულდა. მეორე ტაიმში სტუმრები გააქტიურდნენ და 50-ე წუთზე იაკობსენმა ანგარიში გახსნა. ზუსტად 3 წუთში, მასპინძლებს სიჭინავა გაუძევეს და დემჩენკოს გუნდმა გარდამტეხი უპირატესობა სწორედ ამის შემდეგ მოიპოვა.

აჭარლები ბევრს უტევდნენ, თუმცა 10-კაციანმა „კოლხეთმა“ წონასწორობის აღდგენა მაინც მოახერხა. 67-ე წუთზე თავი ჯიჯავაძემ გამოიჩინა.

„დინამომ“ ზეწოლა გაზარდა და 86-ე წუთზე ფლამარიონმა ეფექტური გოლი გაიტანა. მსაჯის მიერ კომპენსირებულ დროში ფლამარიონმა დუბლი შეასრულა და მატჩის საბოლოო შედეგი დააფიქსირა. რამდენიმე წუთში კი გრიგოლ ჩაბრაძე გააძევეს, რომელიც ფინალს გამოტოვებს.