ყაზაიშვილის დუბლი და საგოლე გადაცემა - ვაკო კორეაში ბრწყინავს

ვაკო ყაზაიშვილი სამხრეთ კორეის ჩემპიონატში წარმატებით ასპარეზობას განაგრძობს. ამჯერად „უსლან ჰიუნდაის“ ქართველმა ლეგიონერმა „ჩეჯუ იუნაიტედის“ წინააღმდეგ მოგებულ (5:1) შეხვედრაში დუბლი შეასრულა და ერთი საგოლე გადაცემაც გააკეთა.

K-ლიგის მე-18 ტურის შეხვედრაში ვაკომ 32-ე წუთზე პენალტის ნიშნულიდან ანგარიში გახსნა. 71-ე წუთზე გუნდელს გაატანინა და ანგარიში 4:0 გახდა. 91-ე წუთზე კი შეხვედრას წერტილი დაუსვა და მე-5 გოლის ავტორი გახდა.

ვაკომ K-ლიგის ამ სეზონში 17 მატჩი ჩაატარა და 8 გოლის გატანა მოახერხა. ყაზაიშვილი ისევე როგორც სხვა მატჩებში, დღესაც სასტარტო შემადგენლობაში იმყოფებოდა.

„უსლან ჰიუნდაი“ 18 ტურის შემდეგ, 44 ქულით ერთპიროვნული ლიდერია და უახლოეს მდევარ „პოჰანგს“ 14 ქულით უსწრებს.