დუბაიში გასამართ ტურნირზე ბასილაშვილს მეტოქე შეეცვალა

დოჰას ტურნირის ფინალში მარცხის შემდეგ, საქართველოს პირველი ჩოგანი, ნიკოლოზ ბასილაშვილი არაბთა გაერთიანებულ ემირატებში დაგეგმილ საერთაშორისო ტურნირზე (DUTY FREE TENNIS CHAMPIONSHIPS) იასპარეზებს, რომლის საპრიზო ფონდი 2 949 665 აშშ დოლარია.

ცნობილი იყო, რომ ბასილაშვილისთვის ტურნირი საკმაოდ რთული შეხვედრით დაიწყებოდა და  პირველ წრეში მისი მეტოქე ფელიქს ოჟე-ალიასიმი იქნებოდა, რომელიც ტურნირზე მესამე ნომრად გახლდათ განთესილი, თუმცა გაირკვა, რომ 29 წლის ქართველი ჩოგბურთელი გათამაშებას კანადელთან შეხვედრით აღარ დაიწყებს, ვინაიდან, ფელიქსი ტრავმირებულია - კანადელს ზურგი აწუხებს, მას კი ავსტრალიელი ალექსეი პოპირინი შეცვლის.

აღსანიშნავია, რომ ფელიქს ოჟე-ალიასიმი ბასილაშვილისთვის,  საკმაოდ უხერხულ მეტოქედ ითვლება,  ქართველს კარიერაში სამჯერ შეხვდა და სამივე შეხვედრა მოუგო, 2019 წელს მაიამისა და ლიონში, 2020 წელს კი - ცინცინატიში.

ინფორმაციისთვის გეტყვით, რომ ტურნირზე პირველ ნომრად სერბი ნოვაკ ჯოკოვიჩია განთესილი.

შეგახსენებთ, რომ ბასილაშვილის ბოლო ტურნირი დოჰას 250-ქულიანი კატეგორიის გათამაშება იყო, სადაც რამდენიმე დღის წინ, ფინალში,  ტიტულის დასაცავად, რობერტო ბაუტისტა აგუტის დაუპირისპირდა და ორ სეტში - 3:6 4:6 დამარცხდა.