#დარჩი სახლში | CrystalSport-ის განცხადება
CrystalSport-ის რედაქცია გთხოვთ და მოგიწოდებთ: დარჩით სახლში! ბოლო 6 დღის განმავლობაში ჩვენს ქვეყანაში Covid-19-ით, დაახლოებით, 200-მდე ადამიანი დაინფიცირდა, რაც ვირუსის გავრცელების სისწრაფის ზრდაზე ნათლად მიუთითებს - ამ მომენტისთვის, უკვე 370 დადასტურებული შემთხვევაა.
ამირან გამყრელიძე: „მოვუწოდებ მოსახლეობას: ნუ წავალთ ლიტურგიაზე, ნუ წავალთ ეკლესიებში, ნუ შევიკრიბებით მრავლად - სახლშიც კი. ჩვენთვის ეს უახლოესი დღეები კრიტიკულია, ბრწყინვალე შვიდეულის დღეებში არ შევიკრიბოთ არც საფლავებზე, რათა ის არ მოხდეს, რაც ჩვენზე გაცილებით ძლიერ სახელმწიფოებში ხდება, სადაც ყოველდღიურად ასეულობით ადამიანი იღუპება“, - განაცხადა გამყრელიძემ გუშინდელი პრესკონფერენციისას.
როგორც ხედავთ, მდგომარეობა სერიოზულია და ერთადერთი იარაღი, რომლითაც შეგვიძლია, ვირუსსა და მის გავრცელებას ვებრძოლოთ, სახლში დარჩენა და წესების დაცვაა.
CrystalSport-ის რედაქცია იცავს რეკომენდაციებს, თითოეული ჩვენგანი სახლიდან, წესების დაცვით, მუშაობს! მოგიწოდებთ: დარჩით სახლში, დაიცავით წესები - არ ჩააგდოთ თქვენი და თქვენთვის საყვარელი ადამიანების სიცოცხლე საფრთხეში! დავიცვათ წესები, რათა ცხოვრების ჩვეული რიტმი, და მასთან ერთად სპორტიც, მალე დაგვიბრუნდეს!
ჩვენი გუნდის სახელით, გილოცავთ აღდგომის ბრწყინვალე დღესასწაულს და გისურვებთ ჯანმრთელობას!