შენგელიას 21 ქულა და მარცხი "ოლიმპიაკოსთან"
თორნიკე შენგელიას "ბასკონიამ" ევროლიგის გათამაშების რიგით მეორე შეხვედრა გამართა. ვიტორიელებმა საკუთარ არენაზე ბერძნულ გრანდს, "ოლიმპიაკოსს" უმასპინძლეს და დაძაბულ ბრძოლაში 80-85 დამარცხდნენ.
შეხვედრა სტუმრების უპირატესობით დაიწყო. ბერძნებმა პირველი მეოთხედი 8 ქულიანი სხვაობით მოიგეს და შესვენებაზე 11 ქულიანი ჰანდიკაპით გავიდნენ. მესამე მეოთხედი იგივე სცენარით წარიმართა და "ოლიმპიაკოსი" გადამწყვეტ პერიოდს 15 ქულიანი უპირატესობით შეხვდა. მიუხედავად ყველაფრისა "ბასკონიამ" ბოლომდე იბრძოლა და სხვაობა 3 ქულამდე შეამცირა, თუმცა ბერძნების კლასმა თავისი ქნა.
თორნიკე შენგელია ორივე გუნდის რიგებში ერთ-ერთი საუკეთესო იყო. ქართველმა მძიმე ფორვარდმა აქტივში 21 ქულა, 4 მოხსნა, 1 გადაცემა, 1 ჩაჭრა და 1 ბლოკი ჩაიწერა. თოკომ 10-დან 7 ორიანი, 2-დან 1 სამიანი და 5-დან 4 საჯარიმო გამოიყენა.
შენგელიას გარდა "ბასკონიელთა" რიგებში 10 ქულიანი ნიშნული გრეინჯერმა (17) და პუარიემ (10) გადალახეს. მეთიუ ჯენინგის ანგარიშზე კი 6 ქულა იყო.
"ოლიმპიაკოსის" მხრიდან 23 ქულით ნიკოლა მილუტინოვი გამოირჩა. ვასილის სპანულისმა გუნდს 11 ქულა შესძინა, ხოლო იანის სტრელნიეკსმა მატჩი 10 ქულით დაასრულა.