ზურიკომ გაიტანა და აქტიურობდა | სენტ-ეტიენმა გრენობლს მოუგო

საფრანგეთის ლიგა 2-ის მესამე ტურში ზურიკო დავითაშვილის „სენტ-ეტიენმა“ „გრენობლს“ უმასპინძლა და 4:0 გაიმარჯვა.

ქართველი ფეხბურთელი სათადარიგო იყო და თამაშში 27-ე წუთზე, ტრავმირებული იაკობ ბრეუმის ნაცვლად ჩაერთო. პირველ 20 წუთში „მწვანეებმა“ ორი გოლი გაიტანეს - თავი ჯერ არონ ჩონგვაიმ, შემდეგ კი ტიერნო ბალომ გამოიჩინა.

პირველი ტაიმის მიწურულს ირვინ კარდონამ „სენტ-ეტიენის“ მესამე გოლი გაიტანა და შესვენებაზე ზურიკოს გუნდი სერიოზული უპირატესობით გავიდა. მეორე ტაიმში ისევ „მწვანეები“ უტევდნენ, მეოთხე გოლი კი ზურიკო დავითაშვილმა გაიტანა.

Sofascore-მა ზურიკოს თამაში 8.1 ქულით შეაფასა, მისი სტატისტიკა კი ასეთი იყო: 3 დარტყმა, 2 დარტყმა კარში, 68 შეხება ბურთთან, 1 საკვანძო პასი, 46-დან 44 ზუსტი პასი (96%) და 9-დან 5 მოგებული ორთაბრძოლა.

დავითაშვილის გოლი და გამორჩეული მომენტები

3 ტურის შემდეგ „სენტ-ეტიენი“ 9 ქულით სატურნირო ცხრილის პირველ ადგილზეა. მომდევნო მატჩს დავითაშვილის გუნდი 31 აგვისტოს სტუმრად „დიჟონის“ წინააღმდეგ გამართავს.