ზედიზედ მე-5 გამარჯვება - ბასილაშვილი მურსიის ჩელენჯერზე ნახევარფინალშია

ესპანეთის ქალაქ მურსიაში მიმდინარე ჩელენჯერის ტურნირზე, ქართველმა ჩოგბურთელმა ნიკოლოზ ბასილაშვილმა მეხუთე გამარჯვება მოიპოვა და ნახევარფინალში გავიდა.

ბასილაშვილის მეტოქე არგენტინელი მარკო ტრუნხელიტი იყო, რომელიც 2 საათსა და 41 წუთში, ურთულეს ბრძოლაში 4:6, 6:3, 6:4 დაამარცხა.

არგენტინელი ტურნირის მოქმედი ჩემპიონი იყო და ბოლო 12 შეხვედრიდან 11 ჰქონდა მოგებული.

ბოლო სეტში ბასილაშვილი 2:4-ს აგებდა, თუმცა თამაშში დროულად დაბრუნდა და ზედიზედ 4 გეიმის მოგება შეძლო.

ნახევარფინალში ნიკოლოზის მეტოქე ტურნირის პირველი ნომერი ესპანელი ალბერტ რამოს-ვინოლასი იქნება.

ტურნირის საპრიზო ფონდი 74 825 ევროს შეადგენს.