კუნდეს შემდეგ ასპილიკუეტა? ბარსა ფეხბურთელს უკვე დაუკავშირდა

„ბარსელონა“ ჟიულ კუნდეს ტრანსფერის დასრულების შემდეგ, სესარ ასპილიკუეტაზე გადაერთვება. წერს ფაბრიციო რომანო.

როგორც მოგეხსენებათ, „ბლაუგრანამ“ კუნდეს ტრანსფერი 99%-ით დახურა და ფრანგის გაფორმება მალე ოფიციალურად გამოცხადდება. სიაში კი მომდევნო „ჩელსის“ კაპიტანია.

ფაბრიციო რომანოს ინფორმაციით, კატალონიელები 32 წლის ესპანელს დაუკავშირდნენ და დაუდასტურეს, რომ „ჩელსისთან“ მოლაპარაკებები გრძელდება და მას შეუძლია მშვიდად იყოს.

ამ დროისთვის გუნდები სრულ შეთანხმებას ვერ ახერხებენ, რადგან „ჩელსის“ მთავარი მწვრთნელი თომას ტუხელი ასპილიკუეტას გუნდში დარჩენის მომხრეა.

სატრანსფერო თანხად დაახლოებით 4-5 მილიონი ევრო სახელდება.

შეგახსენებთ, რომ თუ „ასპი“ „ბარსელონაში“ გადავიდა, ეს კატალონიელთათვის კესის, კრისტენსენის, რაფინიას, ლევანდოვსკისა და კუნდეს შემდეგ, რიგით მე-6 ახალწვეული იქნება.