ფედერერმა რეიტინგის ლიდერობა შეინარჩუნა, კერბერი გაანადგურეს

უკვე გადაჭრით შეგვიძლია ვთქვათ, რომ როჯერ ფედერერი მომავალი კვირიდანაც მსოფლიოს პირველი ჩოგანი იქნება.

ლეგენდარულმა შვეიცარიელმა, ინდიან უელსის მასტერსის 1/4 ფინალურ შეხვედრაში სამხრეთ კორეელ ჰიონ-ჩუნს 2 სეტში მოუგო და ტიტულის დასაცავად ბრძოლას აგრძელებს.

ფედერერი პირველ სეტში ბრეიკით დაწინაურდა, თუმცა ჩუნმა წონასწორობა აღადგინა და საქმე მე-12 გეიმამდე მივიდა, სადაც ფედერერმა მოუმატა და სეტი 7:5-ზე დახურა. მეორე პარტიაში მისი უპირატესობა აშკარა იყო და საქმის გამარჯვებამდე მიყვანა აღარ გასჭირვებია - 7:5, 6:1.

რიგით მეორე 1/4 ფინალურ დაპირისპირებაში ხორვატი ბორნა ჩორიჩი და სამხრეთ აფრიკელი კევინ ანდერსონი ხვდებოდნენ.

თამაშის ბედი 3 სეტში გადაწყდა და საბოლოოდ უფრო ძლიერი ჩორიჩი აღმოჩნდა, რომელმაც მე-3 სეტი ტაიბრეიკზე აიღო - 2:6, 6:4, 7:6.

ჩორიჩი ტურნირის 1/2 ფინალში ფედერერს შეხვდება, ხოლო მეორე ნახევარფინალურ წყვილს დღევანდელი მატჩების შემდეგ მივიღებთ - სემ ქუერის მეტოქე მილოშ რაონიჩი იქნება, ხოლო ხუან მარტინ დელ პოტრო ფილიპ კოლშრაიბერს შეხვდება.

ქალთა შორის მეორე 1/2 ფინალური წყვილი დარია კასატკინამ და ვენუს უილიამსმა შეადგინეს, რომელთაც თავიანთი მატჩები ძალიან იოლად მოიგეს.

კასატკინა სენსაციის ავტორი გახდა და ტურნირის ერთ-ერთ ფავორიტ ანგელიკ კერბერს, 58 წუთში, 6:0, 6:2-ზე გადაურბინა.

უილიამსმა ესპანელი კარლა სუარეს ნავაროს წინააღმდეგობა 6:3, 6:2-ზე დაძლია.

ორივე 1/2 ფინალური შეხვედრა ხვალ გამთენიისას გაიმართება - თბილისის დროით დილის 6 საათზე, კორტზე კასატკინა და უილიამსი გამოვლენ, ხოლო მათი შეხვედრის შემდეგ სიმონა ჰალეპი და ნაომი ოსაკა ითამაშებენ.