2 ივლისს იჩხუბებს | გურამ ქუთათელაძე UFC-ის ოქტაგონს უბრუნდება
UFC-ის ქართველი მებრძოლი, გურამ ქუთათელაძე ოქტაგონზე ბრუნდება. დიდხნიანი პაუზის შემდეგ, „ქართველი ვიკინგი“ UFC on ESPN 48-ზე იჩხუბებს და მისი მეტოქე ბრაზილიელი მებრძოლი, ელვეს ბრენერი იქნება.
ქუთათელაძის დაბრუნების შესახებ, თავდაპირველად, ინფორმაცია MMA Time-მა გაავრცელა. მოგვიანებით, გურამმა „ინსტაგრამის“ საკუთარ გვერდზე პოსტი გამოაქვეყნა და დაადასტურა, რომ ზემოთ ხსენებულ ღონისძიებაზე იჩხუბებს, რომელიც თბილისის დროით, 2 ივლისს გაიმართება. ბრენერს ჯორდან ლივიტის წინააღმდეგ უნდა ეჩხუბა, მაგრამ იგი ბრძოლას ჩაეხსნა და გურამმა ჩაანაცვლა.
View this post on Instagram
„ქართველი ვიკინგის“ მეტოქეს კარიერაში 17 ბრძოლა აქვს გამართული და გამარჯვება 14-ჯერ იზეიმა. ბრენერი გრეპლერია და პარტერში ძალიან სახიფათოა. 14 მოგებიდან მან 11-ჯერ მახრჩობელა/მტკივნეული ილეთით იმარჯვა, ერთხელ ნოკაუტით მოიგო, ორჯერ კი - მსაჯების გადაწყვეტილებით. ბრაზილიელს UFC-ში 1 ბრძოლა აქვს გამართული და ზუბაირა ტუხუგოვს მსაჯების გაყოფილი გადაწყვეტილებით სძლია.
შეგახსენებთ, რომ გურამ ქუთათელაძეს MMA-ს ეგიდით ჩატარებულ 15 შეხვედრაში 12 მოგება და 3 მარცხი აქვს. UFC-ში ქართველმა მებრძოლმა ბოლოს 2022 წლის 18 ივნისს იჩხუბა და დამირ ისმაგულოვთან მსაჯების საკამათო გადაწყვეტილებით დამარცხდა. ქართველს ბოლოს ჯეიმი მალარკის წინააღმდეგ უნდა ეჩხუბა, მაგრამ ბრძოლას ვიზის პრობლემების გამო ჩაეხსნა.
