ოფიციალურად: ასტონ ვილამ ბარსელონადან კოუტინიო გამოისყიდა
ბირმინჰემის „ასტონ ვილამ“ „ბარსელონადან“ ფილიპე კოუტინიო საბოლოოდ გამოისყიდა.
ინფორმაციას ინგლისური კლუბის ოფიციალური ვებ გვერდი ადასტურებს.
PC23. ⭐ pic.twitter.com/NfxqJjIoEv
— Aston Villa (@AVFCOfficial) May 12, 2022
„ვილამ“ ბრაზილიელთან კონტრაქტი 2026 წლამდე გააფორმა. ინგლისელებს გარიგების ოდენობა არ გაუმხელიათ, მაგრამ „ბარსელონამ“ განაცხადა, რომ ისინი 20 მილიონ ევროს მიიღებენ და ფეხბურთელის ხელახალი გაყიდვის შემდეგ თანხის 50%-ს.
იანვარში კოუტინიო „ასტონ ვილას“ იჯარით შეუერთდა. პრემიერ ლიგის 15 მატჩში მან 4 გოლი გაიტანა და 3 საგოლე გადაცემა გააკეთა.
რაც შეეხება „ბარსას“, კატალონიელებმა საბოლოო ჯამში ბრაზილიელის ტრანსფერით ისტორიული ზარალი ნახეს.
კოუტინიო „ბარსელონაში“ 2018 წლის იანვარში „ლივერპულიდან“ 120+40 მილიონ ევროს სანაცვლოდ გადავიდა. კატალონიური კლუბის შემადგენლობაში მან ორჯერ მოიგო ლა ლიგა და ასევე ესპანეთის თასი, ასევე აიღო ქვეყნის სუპერთასი. 106 შეხვედრაში 25 გოლი გაიტანა და 14 საგოლე გადაცემა შეასრულა.