მორიგი რეკორდი - რონალდუ მესის შედეგს გაუთანაბრდა
ტურინის „იუვენტუსმა“ ბუდაპეშტის „ფერენცვაროშს“ ბოლო წუთებზე გატანილი გოლით მოუგო, კრიშტიანუ რონალდუ კი ჩემპიონთა ლიგის მორიგ რეკორდს გაუთანაბრდა.
პორტუგალიელმა სუპერვარსკვლავმა უნგრელთა კარში გუშინ ერთი ბურთი გაიტანა და ევროპის ყველაზე პრესტიჟული საკლუბო ტურნირის საშინაო თამაშებში თავი 70-ედ გამოიჩინა, რაც სარეკორდო მაჩვენებელია.
70 - #CristianoRonaldo has scored 70 goals in Champions League home games: a joint-record for home goals in the history of the competition, level with Lionel Messi. Monsters.#ChampionsLeague #UCL pic.twitter.com/uU0HzYm1LI
— OptaPaolo (@OptaPaolo) November 24, 2020
ლიგის საშინაო მატჩებში ასევე 70 გოლი ლიონელ მესის აქვს გატანილი, რონალდუს კი მისი გადასწრების საშუალება, თუ მოედანზე იქნება, შემდეგ ტურშივე, კიევის „დინამოსთან“ სახლის შეხვედრისას მიეცემა.
კრიშტიანუმ ჩემპიონთა ლიგის მიმდინარე გათამაშებაზე პირველი გოლი გაიტანა. მან წინა ტურში მხოლოდ ასისტი მიითვალა, პირველ ორ მატჩში კი მონაწილეობა არ მიუღია.
„იუვენტუსი“ ჯგუფში „ბარსელონას“ 3 ქულით ჩამორჩება, მაგრამ, გუშინდელი შედეგებით, 1/8 ფინალში ასპარეზობა გაინაღდა. აქვე აღვნიშნოთ, რომ გუშინდელი სათამაშო დღის შემდეგ, შემდეგი ეტაპის საგზური „ბარსას“ და „იუვეს“ გარდა, „ჩელსიმ“ და „სევილიამაც“ გაიფორმეს.
ტურინელები მომავალ ოთხშაბათს კიევის „დინამოს“ თავიანთ არენაზე მიიღებენ, იქამდე კი სერია A-ს ეგიდით „ბენევენტოს“ ესტუმრებიან.