ოთხ სეტში - ზვერევმა ალკარასს მოუგო და AUS OPEN-ის ნახევარფინალში გავიდა
ავსტრალიის ღია პირველობის მეოთხედფინალში ბევრისთვის მოულოდნელი შედეგი დაფიქსირდა. ერთმანეთს ალექსანდრ ზვერევი და კარლოს ალკარასი დაუპირისპირდნენ. გამარჯვება გერმანელმა ჩოგბურთელმა 4 სეტში 6:1 6:3 6:7 6:4 მოიპოვა.
პირველი სეტი ზვერევის დომინირებით წარიმართა, სადაც გერმანელმა 2 ბრეიკი შეასრულა და ლოგიკურ შედეგს მიაღწია. არც მეორე სეტი იყო განსხვავებული. ალექსანდრმა კვლავ 2 ბრეიკი შეასრულა და სეტებს შორის ანგარიში 2:0 დააფიქსირა.
აღსანიშნავია, რომ გერმანელი მესამე სეტსაც ბრეიკით იგებდა, თუმცა ალკარასმა მატჩში დაბრუნება შეძლო და სეტი ტაი-ბრეიკზე გადაიყვანა, სადაც გამარჯვება ესპანელს დარჩა.
მეოთხე სეტი დაძაბულად მიმდინარეობდა, თუმცა იმ დროს, როდესაც ანგარიში 4:4 იყო, კარლოსმა თავისი ჩაწოდება დათმო და ზვერევმა მატჩზე უშეცდომოდ ჩააწოდა. 6:4 და ალექსანდრი ნახევარფინალშია, სადაც დანილ მედვედევს დაუპირისპირდება.
Zverev ➡️ Semi-finals @AustralianOpen | #AusOpen | @AlexZverev pic.twitter.com/GomWwOXKgN
— ATP Tour (@atptour) January 24, 2024
