ლივერპულის ქომაგები სიტის ავტობუსს თავს დაესხნენ

პრემიერ ლიგის გასულ ტურში „ლივერპულმა „მანჩესტერ სიტის“ უმასპინძლა და სალაჰის ერთადერთი გოლის წყალობით, უმძიმეს ბრძოლაში 1:0 დაამარცხა. მატჩის მიმდინარეობისას, რამდენიმე კონფლიქტი ვიხილეთ, თუმცა ყველაფერი მშვიდობიანად დასრულდა.

მიუხედავად მშვიდობიანად დასრულებული გაუგებრობებისა, შეხვედრის შემდეგ, სიტუაცია გულშემატკივრებმა დაძაბეს. Sky Sports იუწყება, რომ იმ დროს, როდესაც „მანჩესტერ სიტის“ ავტობუსი „ენფილდს“ ტოვებდა, მერსისაიდული გრანდის ქომაგები თავს დაესხნენ.

BREAKING: Manchester City say that their team bus was attacked leaving Anfield last night. pic.twitter.com/RYqC0eH4kJ

— Sky Sports News (@SkySportsNews) October 17, 2022

გავრცელებული ინფორმაციით, „ქალაქელების“ ავტობუსს ქვები დაუშინეს და რამდენიმე ფანჯარა გაიბზარა. აღსანიშნავია, რომ ეს პირველი შემთხვევა არ არის. მსგავსი ფაქტი 2018 წლის ჩემპიონთა ლიგური დაპირისიპირების დროს განმეორდა. კლოპის გუნდმა საკუთარ კედლებში „სიტი“ დაამარცხა და ქომაგები ავტობუსს მაინც დაესხნენ თავს.

4 წლის წინ, „მანჩესტერ სიტიმ“ არ იჩივლა, თუმცა ახლა სიტუაცია სხვანაირად არის. ინგლისური გიგანტი „ლივერპულის“ ქომაგებს უჩივის. პრემიერ ლიგის მოქმედი ჩემპიონის იურისტები ითხოვენ, რომ „ლივერპულმა“ რამდენიმე მატჩი გულშემატკივრების გარეშე ჩაატაროს.