დიდებული მატჩი კამპ ნოუზე - ბარსელონამ და ინტერმა ქულები გაიყვეს

ჩემპიონთა ლიგის მეოთხე ტურში ცენტრალური დაპირისპირება გაიმართა. „ბარსელონამ“ „ინტერს“ უმასპინძლა. მატჩი ფრედ 3:3 დასრულდა და „ბლაუგრანამ“ ჯგუფიდან გასვლის საკითხი დიდი კითხვის ნიშნის ქვეშ დააყენა.

გულშემატკივრებმა დაუვიწყარი დაპირისპირება იხილეს. მომენტებს მთელი მატჩს განმავლობაში ორივე გუნდი ქმნიდა და მეკარეები ბრწყინვალე „სეივებს“ გვთავაზობდნენ. ანგარიში მე-40 წუთზე უსმან დემბელემ გახსნა და პირველი ტაიმი 1:0 დასრულდა.

ყველაზე მთავარი მეორე ტაიმში მოხდა. 50-ე წუთზე ბარელამ პიკეს ბავშვური შეცდომით ისარგებლა და წონასწორობა აღადგინა. კატალონიელებს 3 ქულა ჰაერივით სჭირდებოდათ და შეტევაში დიდი ძალებით გადავიდნენ. აქედან გამომდინარე ბარსას „ინტერის“ კონტრ-შეტევები რამდენჯერმე გამორჩა.

63-ე წუთზე ლაუტარო მარტინესმა „ნერაძური“ დააწინაურა. ჩავის შეგირდები კიდევ უფრო მეტად გააქტიურდნენ და 82-ე წუთზე ლევანდოვსკიმ გაისროლა - 2:2. ამის შემდეგ, „ბარსელონა“ დაცვაზე საერთოდ აღარ ფიქრობდა და ამის გამო დაისაჯა. 89-ე წუთზე გიოსენსმა „ინტერი“ დააწინაურა და თითქოს ყველაფერი დამთავრებული იყო, მაგრამ პოლონელმა თავდამსხმელმა მსაჯის მიერ კომპენსირებულ დროში ანგარიში გაათანაბრა და საბოლოო შედეგი 3:3 დააფიქსირა.

ცნობისთვის, ამ მატჩის შემდეგ, „ბარსელონას“ 4 ქულა აქვს და სატურნირო ცხრილში მესამე პოზიციაზე იმყოფება. „ინტერს“ კი 7 ქულა დაუგროვდა და მეორე ადგილზე მოგვევლინა. პირველ საფეხურზე 12 ქულით „ბაიერნია.“

იმ შემთხვევაში, თუ „ინტერი“ დარჩენილი ორი შეხვედრიდან ერთს მაინც მოიგებს, „ბარსელონა“ ზედიზედ მეორედ ჯგუფში ჩარჩება.