რუსის გავლით ნახევარფინალში - ლოლუა წინ მიიწევს

ყაზახეთში დღეს სტარტი ჭიდაობის მსოფლიოს ჩემპიონატმა აიღო და ტრადიციულად, თავდაპირველად საქმეში ბერძნულ-რომაული სტილით მოჭიდავეები ჩაერთნენ. შეჯიბრების პირველ დღეს ხალიჩაზე 55, 60, 77 და 82 კილოგრამის მოჭიდავეები გავიდნენ და ოქროს მედლისთვის ბრძოლას ქართველებიდან მხოლოდ უმჩატესი წონის წარმომადგენელი ვახტანგ ლოლუა განაგრძობს.

ლოლუამ ჯერ სომეხ ნორაირ ჰაჰოიანს 2:1 მოუგო, ხოლო შემდეგ მეოთხედფინალში რუსი ემინ სეფერშაევი 6:2 დაამარცხა და ნახევარფინალში გავიდა. გელა ბოლქვაძემ (82 კგ) და რამაზ ზოიძემ (77 კგ) წლევანდელი პლანეტის პირველობა მერვედფინალურ ეტაპზე დაასრულეს, ხოლო დიმიტრი ხაჩიძემ (60 კგ) საკვალიფიკაციო ეტაპიც ვერ გადალახა. თუ ბოლქვაძისა და ზოიძის მომგები მეტოქეები ფინალში გავლენ, მაშინ ამ ორ სპორტსმენს ბრინჯაოსთვის ბრძოლის შანსი გაუჩნდება.

ცნობისათვის, ზემოთ ჩამოთვლილი ოთხი სპორტსმენის გარდა, ბერძნულ-რომაული სტილით ჭიდაობაში ჩვენს ქვეყანას კიდევ ექვსი სპორტსმენი, ფრიდონ აბულაძე (63 კგ), დიეგო ჩხიკვაძე (67 კგ), იური ლომაძე (72 კგ), ლაშა გობაძე (87 კგ), რობერტ კობლიაშვილი (97 კგ) და სულხან ბუაძე (130 კგ) წარადგენს.