ქოჩორას ასისტი და სრული მატჩი | სპორტინგმა აფს გაანადგურა

პორტუგალიის ჩემპიონატის მე-14 ტურში გიორგი ქოჩორაშვილის ლისაბონის „სპორტინგმა“ „აფს“-ს უმასპინძლა 6:0 გაანადგურა. ქართველი ნახევარმცველი მიმდინარე სეზონში მეშვიდედ „ლომების“ ძირითად შემადგენლობაში მოგვევლინა (1 თასზე, 1 ლიგის თასზე, 1 ჩემპიონთა ლიგაზე, 4 ჩემპიონატში) და სრული მატჩი ჩაატარა.

Sofascore-მა ქართველი ნახევარმცველის თამაში 7.4 ქულით შეაფასა. ქოჩორას სტატისტიკა ასეთი იყო: 2 საკვანძო პასი, 88-დან 79 ზუსტი პასი (90%), 6-დან 5 ზუსტი გრძელი პასი, 2 დარტყმა, 1 დარტყმა კარში, 97 შეხება ბურთთან, 2-დან 1 მოგებული ორთაბრძოლა და 2-დან 1 მოგებული საჰაერო ორთაბრძოლა. ქართველმა 11-ჯერ დაკარგა ბურთი და მეტოქეს ყვითელი ბარათიც მიაღებინა.

რაც შეეხება მატჩის მიმდინარეობას, ანგარიში 32-ე წუთზე მასპინძელთა კოლუმბიელმა ფორვარდმა, ლუის სუარესმა გახსნა. მალევე მაქსიმილიანო არაუჟომ „ლომების“ უპირატესობა ორამდე გაზარდა, 37-ე წუთზე კი ქოჩორაშვილის პასის შემდეგ ჟენი კატამომ „აფს“-ის კარში მესამე გოლი გაიტანა.

მეორე ტაიმის სტარტზე დუბლი არაუჟომ შეასრულა, რამდენიმე წუთში კი მეორე გოლი სუარესმაც გაიტანა. 75-ე წუთზე ქოჩორას გოლის გატანაც შეეძლო, თუმცა ამ ეპიზოდში შესანიშნავი იყო სტუმართა მეკარე ჟოაო გონსალვეში. მატჩის მიწურულს კი „სპორტინგმა“ მეექვსე გოლიც გაიტანა - დუბლი კატამოს ანგარიშზეა.

14 ტურის შემდეგ „სპორტინგს“ 35 ქულა აქვს. „ლომები“ სატურნირო ცხრილის ლიდერ „პორტუს“ 2 ქულით ჩამორჩებიან, თუმცა „დრაკონებს“ ერთი მატჩით ნაკლები აქვს ჩატარებული. მომდევნო მატჩს ქოჩორას გუნდი 18 დეკემბერს, პორტუგალიის თასზე, სტუმრად, „სანტა კლარას“ წინააღმდეგ გამართავს.