თელავი უმაღლესში დარჩა | სპაერმა ზედიზედ მეორე პლეი-ოფი დათმო

„Crystalbet ეროვნული ლიგა“-ის პლეი-ოფის საპასუხო მატჩში, „თელავმა“ „სპაერს“ უმასპინძლა და დიდი ანგარიშით - 4:0 დაამარცხა. გუნდებს შორის გამართული პირველი შეხვედრა 1:1 დასრულდა, დღეს კი კახელების უპირატესობა სრულიად აშკარა იყო.

თელაველებმა ყველაფერი პირველსავე ტაიმში გადაწყვიტეს: ანგარიში იმედა აშორტიამ 11-მეტრიანი დარტყმით გახსნა, შემდეგ ირაკლი რუხაძემ და გიორგი ქანთარიამ შეაგდეს და 28-ე წუთისთვის ტაბლოზე უკვე 3:0 ენთო.

მეორე ნახევრის სტარტზე, 53-ე წუთზე, აშორტიამ თამაშიდანაც გაიტანა, დუბლი მიითვალა და, როგორც აღმოჩნდა, საბოლოო ანგარიში დააფიქსირა.

თელავი (3-4-3): ქურდაძე - ფაცაცია, ცნობილაძე, გაბიტაშვილი - მორჩილაძე, ქანთარია, ჯერალდო, პარკინაშვილი - აშორტია, რუხაძე, გოშთელიანი. მთ. მწვრთნელი: გეორგიოს კოსტისი.

სპაერი (4-2-3-1): ფუტკარაძე - მატენჯვა, კენჭაძე, ცეცხლაძე, მოსაშვილი - ქართველიშვილი, ცაცკრიალაშვილი - გადრანი, ქებურია, ნაჭყებია - გაბუნია. მთ. მწვრთნელი: კახა მაისურაძე.

გეორგიოს კოსტისის გუნდმა ორრაუნდიანი დუელი დამაჯერებლად მოიგო, „სპაერი“ კი, რომელიც ქვედა დივიზიონში ბოლო წლების ერთ-ერთი საუკეთესო გუნდია, გადმოსასვლელ პლეი-ოფში ზედიზედ მეორედ დამარცხდა. თბილისელებმა გასულ წელს „გაგრა“-სთან, პენალტების სერიით, წააგეს.

ვნახოთ, როგორ ფორმაში შეხვდება „Crystalbet ეროვნული ლიგა“-ის 2024 წლის სეზონს „თელავი“, მისი მეტოქე კი უმაღლესში აღზევებას ისევ მეორე ლიგიდან შეეცდება.

ამით საქართველოს ჩემპიონატის 2023 წლის სეზონი დასრულებულია: უმაღლესში გადმოსასვლელ ორივე პლეი-ოფში, პირველი დივიზიონის გუნდმა გაიმარჯვა - „თელავი“-ს გარდა, „სამტრედია“-მ საგარეჯოს „გარეჯი“, ორი მატჩის ჯამში, 5:4 დაამარცხა.

ჩვენს ჩემპიონატში დაახლოებით 2.5-თვიანი პაუზა გამოცხადდა და ახალი სეზონი 2024 წლის თებერვლის ბოლოდან დაიწყება.