მორიგი ვარჯიში რეიკიავიკში - ნაკრებს დღეს შენგელიაც შეუერთდება

საქართველოს კალათბურთელთა ნაკრების ვარჯიში “ლაუგარდასჰოლში” ორსაათიანი და საკმაოდ პროდუქტიული გამოდგა. დარბაზი, რომელშიც 11 ნოემბერს ისლანდია საქართველოს უმასპინძლებს, მხოლოდ 2000 მაყურებელს იტევს. მოედანს მხოლოდ ცალ მხარეს აქვს ტრიბუნები და როგორც ისლანდიის ფედერაციის პრეზიდენტმა თქვა, ყველა ახალი დარბაზის აშენებას ელოდება.

ილიას ზუროსმა დიდი დრო კომბინაციების დამუშავებას და ორმხრივი კალათბურთის თამაშს დაუთმო. აქცენტი, რა თქმა უნდა დაცვაზე იყო გადატანილი, რაც ბერძენი სპეციალისტის საკალათბურთო ფილოსოფიაში ამოსავალი წერტილი გახლავთ. ნაკრების დარჩენილი ვარჯიშები წინასწარაა გაწერილი. დღეს დილით, ჩვენი გუნდი ფიტნეს-დარბაზში ტრენაჟორებზე ივარჯიშებს, ასევე გარკვეული დრო ფარში სროლებს დაეთმობა. გენერალური ვარჯიში კი საღამოს იგეგმება ნაკრების კაპიტან თორნიკე შენგელიასთან ერთად, რომელიც ნაკრებს უახლოეს საათებში შეუერთდება.

შეგახსენებთ, რომ ისლანდიას საქართველოზე 1 მოგებით მეტი აქვს და ყველაფერი იქით მიდის, რომ სწორედ ამ ორი გუნდიდან ერთ-ერთი მიიღებს ჩვენი ჯგუფიდან მსოფლიოს ჩემპიონატის მე-3 საგზურს. დიდი ალბათობით, მსოფლიოს ჩემპიონატის საგზურებს მოიპოვებენ ამჟამად ჯგუფის 1-2 ადგილებზე თანაბარი ქულებით მყოფი ევროპისა და მსოფლიოს მოქმედი ჩემპიონი ესპანეთი და იტალია.

შეგახსენებთ, რომ ისლანდიისა და საქართველოს ნაკრებების შეხვედრა 11 ნოემბერს, საქართველოს დროით 23:35 საათზე გაიმართება.