კაცი ტრავმების გარეშე - უილიამსმა მორიგი რეკორდი დაამყარა
ლა ლიგის მე-13 ტურში „ბილბაო“ კატალონიაში „ჟირონასთან“ 1:2 დამარცხდა. ბასკთა ფორვარდისთვის ინაკი უილიამსისთვის ეს მატჩი სარეკორდო გამოდგა.
ინაკის 6 წლის განმავლობაში ლა ლიგის 1 მატჩიც არ გამოუტოვებია. უილიამსმა ზედიზედ 246 მატჩი ჩაატარა და მას ტრავმის გამო არცერთი შეხვედრა არ გამოუტოვებია.
ინაკიმ მცველის მანფრედ ბინცის რეკორდი გაიმეორა, რომელმაც „აინტრახტში“ 1987-1994 წლებში ზედიზედ 246 მატჩი ჩაატარა.
ბინცს და უილიამსს ბოლო 40 წლის განმავლობაში მინდვრის მოთამაშეთა შორის ზედიზედ ყველაზე მეტი მატჩი აქვთ ჩატარებული. იგულისხმება ტოპ 5 ლიგა.
შეგახსენებთ, რომ ინაკი უილიამსმა რეკორდი გასულ სეზონშიც დაამყარა, როცა ლა ლიგაში ზედიზედ 203 შეხვედრა ჩაატარა.
უილიამსმა ხუან ანტონიო ლარანიაგას მიღწევა გააუმჯობესა, რომელმაც 1987-დან 1992 წლამდე „სოსიედადის“ მაისური ზედიზედ 202 შეხვედრაში მოირგო. საინტერესოა, რომ ინაკიმ ლა ლიგის ეგიდით, ბოლო მატჩი 2016 წლის 17 აპრილს გამოტოვა, როცა მისმა გუნდმა „მალაგა“ მინიმალური ანგარიშით დაამარცხა.