„ეს დროის ამბავია“ - ჰოლოუეიმ თოფურიას უპასუხა
გასულ უქმეებზე, სინგაპურში გამართული UFC Fight Night-ის მთავარი ბრძოლა ქვემსუბუქ წონაში „კორეელ ზომბისა“ და მაქს ჰოლოუეის ჩხუბი იყო. ამ შეხვედრაში, ამერიკელმა მებრძოლმა „ზომბი“ მეორე რაუნდში ნოკაუტით დაამარცხა და კარიერაში ერთ-ერთი გამორჩეული გამარჯვება ჩაიწერა.
ჰოლოუეის გამარჯვებას სოციალურ ქსელში ამავე წონის ქართველი მებრძოლი, ილია თოფურია გამოეხმაურა. „მატადორმა“ სოციალურ ქსელ „ტვიტერის“ საშუალებით „კორეელ ზომბისა“ და „დალოცვილი“ მაქსის მისამართით პატივისცემა გამოხატა და კარიერის დასრულებისკენ მოუწოდა, სანაცვლოდ კი სატიტულო ბრძოლაზე საჩხუბრად ალექსანდერ ვოლკანოვსკი გამოიწვია და სუპერმსუბუქი წონითი კატეგორიის ახალ ჩემპიონს, შონ ომალისაც მიმართა.
I respect these two @BlessedMMA and @KoreanZombieMMA, but it's time for them to retire. @SugaSeanMMA, keep rising up, and maybe one day we'll share the octagon and you @alexvolkanovski, get ready to tap out! The masterclass is coming for you.
— Ilia Topuria (@Topuriailia) August 26, 2023
Enjoy the weekend, everyone! ????
თოფურიას პოსტიდან რამდენიმე წუთში „ზომბიმ“ კარიერის დასრულების შესახებ გამოაცხადა, ჰოლოუეიმ კი ქართველ მებრძოლს დღეს, ტვიტერზე გამოქვეყნებული პოსტით უპასუხა.
„მადლობა პატივისცემისთვის, მაგრამ ყველაფერს დრო გადაწყვეტს, lol“, - დაწერა ჰოლოუეიმ.
შეგახსენებთ, რომ ილია თოფურიამ ბოლოს 2023 წლის ივნისში იჩხუბა და ჯოშ ემეტი მსაჯების ერთსულოვანი გადაწყვეტილებით დაამარცხა. გამარჯვების შემდეგ, „მატადორმა“ საჩემპიონო ბრძოლაში ქვემსუბუქი წონითი კატეგორიის მრავალგზის ჩემპიონი, ალექსანდერ ვოლკანოვსკი გამოიწვია, სხვა შემთხვევაში კი მაქს ჰოლოუეისთან ბრძოლა მოითხოვა იმ პირობით, თუ ჩხუბი ესპანეთში შედგება.