კორონავირუსი - "ჰარუ ბაშო" მაყურებელთა გარეშე ჩატარდება
10 მარტს ოსაკაში წლის მეორე სუპერტურნირი „ჰარუ ბაშო“ უნდა დაიწყოს, რომელიც როგორც დღეს გახდა ცნობილი მაყურებელთა გარეშე ჩაივლის.
სუმოს ასოციაციამ გაავრცელა განცხადება, სადაც ნათქვამია, რომ კორონავირუსის გავრცელების დიდი რისკიდან გამომდინარე ორთაბრძოლები მაყურებელთა გარეშე ჩაივლის.
სეკიტორებს მთელი ტურნირის განმავლობაში შესაბამისი შემოწმება ჩაუტარდებათ და დოჰიოზე სწორედ ამის შემდეგ გავლენ.
<お知らせ>
— 日本相撲協会公式 (@sumokyokai) March 1, 2020
公益財団法人日本相撲協会は新型コロナウィルス感染拡大防止並びに2月26日の政府見解を受け、 開催を予定しておりました大相撲三月場所は「無観客で開催」とさせていただくことを決定いたしました。https://t.co/OgT0U4gp9q#sumo #相撲 #三月場所 #大坂場所
ვინც უკვე ბრძოლებზე დასასწრები ბილეთები შეიძინა, მათ სავარაუდოდ თანხა დაუბრუნდებათ. ასოციაციაში ამის შესახებაც საუბრობენ. მათი თქმით, ამ საკითხზე მუშაობა მიმდინარეობს და უახლოეს დღეებში ყველაფერი გაირკვევა.
შეგახსენებთ, რომ ახალი ბაძუკეს გამოქვეყნების შემდეგ, როგორც მოსალოდნელი იყო, ქართველი სუმოტორი, ლევან გორგაძე დაქვეითებას ვერ გადაურჩა. ტოჩინოშინი ოსაკას სუპერტურნირზე დასავლეთის მე-9 მაეგაშირას წოდებით გამოვა. ლევანისთვის ეს კარგი პოზიციაა. თუ მან ტრავმები მოიშუშა და ფორმაში ჩადგომა მოასწრო, სასურველი შედეგის დაფიქსირების კარგი შანსი ექნება.
მეორე ქართველს რაც შეეხება, გაგამარუ მაკუშიტას დივიზიონში 35 საფეხურით დააქვეითეს. ჯუღელი ბოლო ბაშოს ტრავმის გამო, ნაადრევად ჩაეხსნა და ვერცერთი გამარჯვება ვერ მოიპოვა. ახალი ბანძუკეს მიხედვით, კი „გაგას“ მაკუშიტაში 44-ე პოზიცია უკავია.