მსოფლიოს საუკეთესო ძალოსნის დაჯილდოება ქობულეთში გაიმართება
ძალოსნობის ეროვნული ფედერაციის აღმასკომის სხდომა გაიმართა, რომელზეც დღის წესრიგით გათვალისწინებული 6 საკითხი განიხილეს.
სხდომაზე ძალოსნობის ეროვნული ფედერაციის პრეზიდენტმა, კახი კახიაშვილმა აღმასკომის წევრებს განსახილველად რამდენიმე საკითხი წარუდგინა, რომელთა შორისაც იყო ქალთა ნაკრების კაპიტნის, თათია ლორთქიფანიძის ბრალდებები ძალოსნობის ფედერაციისა და ქალთა ნაკრების მთავარი მწვრთნელის, თემურ ჯანჯღავას მიმართ.
კახი კახიაშვილმა აღმასკომის წევრების წინაშე, კიდევ ერთხელ გაიხსენა დეტალურად თათია ლორთქიფანიძის ბათუმის ევროპის ჩემპიონატზე ნაკრებში არ დაყენების საკითხი, რის შემდეგაც აღმასკომის წევრების წინაშე თემურ ჯანჯღავაც წარსდგა.
ქალთა ნაკრების მთავარმა მწვრთნელმა კიდევ ერთხელ უარყო მის მიმართ გაჟღერებული ბრალდებები და დამსწრეთ დეტალურად უამბო თათია ლორთქიფანიძის მხრიდან დაწყებული პრობლემების შესახებ, რომლის მიხედვითაც თათია გამუდმებით სხვადასხვა მიზეზების გამო აცდენდა ნაკრების შეკრებებს.
სიტყვა გადაეცა აღმასკომის ყველა წევრს და ბათუმში აღნიშნულ თემაზე გამართული აღმასკომის მსგავსად ამჯერადაც აღმასკომის ყველა წევრი ერთსულოვანი იყო და თემურ ჯანღავას გადაწყვეტილებებს მხარი , ერთხმად დაუჭირეს.
ყველა წევრის მოსმენის შემდეგ, აღმასკომმა მიიღო გადაწყვეტილება, რომ ფედერაციის ხელმძღვანელობა ინტენსიურ რეჟიმში გაესაუბრება დაპირისპირებულ მხარესაც, ასევე ყველა იმ პიროვნებას, რომლებიც სანაკრებო შეკრებების პერიოდში თვალს ადევნებდნენ გუნდის ვარჯიშს, სავარჯიშო პირობებს, ასევე მწვრთნელისა და სპორტსმენის ურთიერთობებს.
აღმასკომის გადაწყვეტილებით, ისინი მზად არიან სასამართლოსთან თანამშრომლობისთვის და შესაბამის ორგანოებს დოკუმენტალურ პასუხებს გასცემენ.
რაც შეეხება თათია ლორთქიფანიძის ნაკრებში დარჩენის საკითხს, სხდომის გადაწყვეტილებით, იმ შემთხვევაში თუ ლორთქიფანიძე დაიცავს დისციპლინას და შეკრებებზე გამოცხადდება, მას კვლავ ექნება ულფება ჩემპიონატებზე გამოსვლისა.
კახი კახიაშვილის განცხადებით, ფედერაცია კვლავ დაიცავს იმ ღირებულებებს და ფასეულობებს, რაზეც დგას ქართული ძალოსნობა. ფედერაციის უმთავრესი ღირებულება დისციპლინასა და იმ წესების დაცვას ეფუძნება, რომელიც აკრძალულ პრემარატებზე უარის თქმას ნიშნავს. აღნიშნულ წესებს უნდა დაემორჩილოს ნაკრების ყველა წევრი, მათ შორის თათია ლირთქიფანიძეც.
დღის წესრიგში ასევე იყო, საქრთველოში 2019 წელს მსოფლიო ჩემპიონატის მასპინძლობის საკითხი. აღმასკომის წევრთა გადაწყვეტილებით, ფედერაცია თანახმაა მიიღოს და მაღალ დონეზე უმასპინძლოს სალიცენზიო მსოფლიო ჩემპიონატს.
ასევე განიხილეს მსოფლიოს საუკეთესო ძალოსნების ლაშა ტალახაძისა და ლიდია ვალენტინის დაჯილდოების ცერემონიის გამართვის საკითხიც, რომელსაც 20 მაის ქობულეთი უმასპინძლებს. აღსანიშნავია, რომ ღონისძიებას ძალოსნობის საერთაშორისო ფედერაციის (IWF) პრეზიდენტი, ტომაშ აიანი დაესწრება და სწორედ ქობულეთში განიხილება საქართველოში მსოფლიო ჩემპიონატის მასპინძლობის საკითხიც.
კიდევ ერთი საკიტხი ევროპის ფედერაციის პოსტზე საქართველოს ძალოსნობის ეროვნული ფედერაციის პრეზიდენტის კახი კახიაშვილის კანდიდატურის წარდგენას ეხებოდა. აღნიშნულ საკითხთან დაკავშირებით დამსწრეთ წარედგინათ სამი ვარიანტი: 1. ევროპის ფედერაციის პრეზიდენტის პოსტზე კანდიდაუტურის დაყენება და გამარჯვებიც შემთხვევაში საქართველოს ფედერაციის პოსტის შენარჩუნება. 2. ევროპის ფედერაციის პოსტზე კანდიდატურის დაყენება და საქართველოს ეროვნული ფედერაციიდან წასვლა. 3. ევროპის ფედერაციის პრეზიდენტის პოსტზე კანდიდატურის დაყენებაზე უარის თქმა და საქართველოს ფედერაციის პრეზიდენტის პოსტის შენარჩუნება.
აღმასკომის გადაწყვეტილებით კახიაშვილმა ევროპის ფედერაციის პრედზიდენტობაზე განაცხადი უნდა წარადგინოს და ამავდროულად საქართველოს ფედერაციის ხელმძღვანელ პოსტზე მუშაობა გააგრძელოს.
