ირაკლი კობახიძის მოწვევით, ილია თოფურია საქართველოში 18 მარტს ჩამოვა
UFC-ის ქვემსუბუქი წონითი დივიზიონის ახალი ჩემპიონი, ილია თოფურია საქართველოში 18 მარტს ჩამოვა. ამის შესახებ საქართველოს მთავრობის სტრატეგიული კომუნიკაციების დეპარტამენტის ხელმძღვანელმა მიხეილ ფეიქრიშვილმა სოციალურ ქსელში დაწერა.
„პრემიერ-მინისტრის მოწვევით, საქართველოში 18 მარტს ილია თოფურია ჩამოვა. თბილისის საერთაშორისო აეროპორტში რეისი 18:30 საათზე დაეშვება“, - განაცხადა ფეიქრიშვილმა.
„ელ მატადორი“ საქართველოსა და ლუქსემბურგის მატჩამდე, UFC-ის საჩემპიონო ქამარს „დინამო არენაზე“ წარადგენს. აღნიშნული შეხვედრა 21 მარტსაა ჩანიშნული და თბილისის დროით, 21:00-ზე დაიწყება.
შეგახსენებთ, რომ ილიამ ალექსანდრ ვოლკანოვსკი მეორე რაუნდში დაანოკაუტა და ქვემსუბუქი წონითი დივიზიონის ახალი ჩემპიონი გახდა. „ვოლკის“ დაფინიშების შემდეგ, თოფურია Pound for Pound რეიტინგში (რეიტინგი წონის გაუთვალისწინებლად) შევიდა. „ელ მატადორი“ მე-5 ადგილზეა და მხოლოდ ალექს პერეირას, ჯონ ჯონსს, ლეონ ედვარდსსა და ისლამ მახაჩევს ჩამორჩება. ილია ისეთ მებრძოლებს უსწრებს, როგორებიც ჩარლზ ოლივეირა, ალეშანდრე პანტოჟა, დემეტრიუს ჯონსონი და სხვები არიან.