თაუნსის რეკორდი და 62 ქულა | მინესოტა მარცხისგან მაინც ვერ იხსნა

NBA-ის დასავლეთ კონფერენციის ლიდერი, „მინესოტა ტიმბერვულვზი“ სენსაციურად დამარცხდა. „მინესოტა“ საკუთარ კედლებში „შარლოთ ჰორნეთსს“ დაუპირისპირდა, რომელიც აღმოსავლეთ კონფერენციის ერთ-ერთი აუტსაიდერია და 125:128 წააგო.

„ტიმბერვულვზის“ რიგებში ისტორიული საღამო ჰქონდა კარლ-ენტონი თაუნსს, რომელმაც შეხვედრა 62 ქულით, 8 მოხსნითა და 2 შედეგიანი გადაცემით დაასრულა. თაუნსს პირველ ტაიმში 44 ქულა ჰქონდა, თუმცა აღსანიშნავია, რომ მეოთხე მეოთხედი ჩააგდო, 10-დან 8 სროლა გააცუდა და მხოლოდ 4 ქულა დააგროვა.

წარუმატებელი ბოლო პერიოდის მიუხედავად, თაუნსმა „მინესოტას“ რეკორდი დაამყარა და „ტიმბერვულვზის“ პირველი კალათბურთელია, ვინც 62 ქულა მიითვალა. ამასთან, იგი NBA-ის ისტორიაში ერთადერთი ცენტრია, რომელმაც მატჩში 60+ ქულა ისე გააკეთა, რომ მინიმუმ 10 სამქულიანი ჩააგდო.

კარლ-ენტონის გარდა, „მინესოტას“ რიგებში 10-ქულიანი ნიშნული ნიკელ ალექსანდერ-უოკერმა და რუდი გობერმა გადალახეს - 18 და 13 ქულა. ენტონი ედვარდსს 9 ქულა ჰქონდა. „ჰორნეთსს“ 28 ქულით მაილს ბრიჯისმა ულიდერა, ბრენდონ მილერმა 27 ქულა ჩააგდო, ლამელო ბოლმა - 18.

„ჰორნეთსთან“ მარცხის მიუხედავად, „მინესოტა“ დასავლეთ კონფერენციის პირველ ადგილზე რჩება და 30 მოგება და 13 წაგება აქვს. „ტიმბერვულვზი“ მომდევნო შეხვედრას 25 იანვარს გამართავს და „ვაშინგტონ უიზარდსს“ დაუპირისპირდება.