რეალი VS ბარსელონა - მატჩის წინ

კოპა დელ რეის ნახევარფინალში გულშემატკივრები „ელ კლასიკოს“ იხილავენ. „რეალი“ „ბარსელონას“ უმასპინძლებს. მატჩის წინ, CrystalSport ყველა მნიშვნელოვან ინფორმაციას ერთ სივრცეში გთავაზობთ.

„რეალი“

მადრიდული გრანდი ამ მატჩს შეიძლება ითქვას კარგ ხასიათზე ხვდება. მიუხედავად იმისა, რომ „ბლანკოსმა“ ლა ლიგის ბოლო ტურში „ატლეტიკოსთან“ 2 ქულა დაკარგა, ჩემპიონთა ლიგაზე მოგებული შეხვედრა „ლივერპულთან“ მათ კარგ განწყობაზე ყოფნის უფლებას აძლევს.

შეგახსენებთ, რომ მადრიდულ დერბის „როხიბლანკო“ იგებდა, თუმცა ახალგაზრდა ალეხანდრო როდრიგესმა მატჩის მიწურულს წონასწორობა აღადგინა და „რეალს“ 1 ქულა გადაურჩინა. სატურნირო ცხრილში კი ბარსასთან სხვაობა 7 ქულაა.

დანაკლისი:

ამ მხრივ ანჩელოტის პრობლემები აქვს. „ელ კლასიკოში“ მონაწილეობას დავიდ ალაბა და ფერლან მენდი ვერ შეძლებენ. ორივე ფეხბურთელს ტრავმა აქვს. მარცხენა მცველის პოზიციაზე ნაჩო ფერნანდესი ან ედუარდო კამავინგა მოგვევლინება.

რა თქვა ანჩელოტიმ მატჩის წინ?

„ხასიათი და გამბედაობაა საჭირო, ასეთ მატჩს სათანადოდ რომ შეხვდე. რა თქმა უნდა, ენთუზიაზმი არ გვაკლია და წინ ლამაზი შეხვედრა გველოდება. ფინალისგან შორს არ ვართ. ბევრი რამაა, რაც ამ მომენტით სიამოვნების მიღების საშუალებას მოგვცემს და მიზნის მისაღწევად მაქსიმუმს გავაკეთებთ. სუპერ თასი?

ჩვენთვის ყველა ტიტული მნიშვნელოვანია, მაგრამ იმ შეხვედრაში თავდადება და სიძლიერე გვაკლდა და ინდივიდუალური შეცდომები დავუშვით, რომლებიც არ უნდა გავიმეოროთ. მნიშვნელოვან ტიტულთან ახლოს ვართ და ბოლომდე ვიბრძოლებთ. ეს გადამწყვეტი შეხვედრა არაა, მაგრამ ვეცდებით, უპირატესობა გამოვიყენოთ.

სუპერ თასის შეხვედრაში განცდილი მარცხის გამო, რევანშის აღება ჩვენი მიზანი არაა. ფინალთან ახლოს ვართ და ამის გამო, ტემპერატურაც იმატებს. გასულ სეზონზე უკეთესად არ გამოვიყურებით და იმ ადგილზე ვიმყოფებით, რომელსაც ვიმსახურებთ, თუმცა ახლა რთული პერიოდი მოდის.

მარტში მარტივი არაფერია, მაგრამ ვეცდებით, ბოლომდე ვიბრძოლოთ და მაქსიმუმი გავაკეთოთ. ნეგრეირას საქმეს რაც შეეხება, ფეხბურთში კორუფციის ადგილი არაა. არ ვიცი, ხვალ მსაჯი ვინ იქნება, მაგრამ გასამარჯვებლად 100 პროცენტით დავიხარჯებით“.

„ბარსელონა“

ჩავი ერნანდესის გუნდს რთული პერიოდი დაუდგა. „ბარსელონა“ ჯერ ევროპის ლიგიდან გამოვარდა. „ბლაუგრანამ“ „მანჩესტერ იუნაიტედის“ ბარიერი ვერ გადალახა, ხოლო შემდეგ ლა ლიგის ბოლო ტურში სტუმრად „ალმერიასთან“ 0:1 დამარცხდა.

დანაკლისი:

კატალონიურ გრანდს ამ კუთხით ბევრი პრობლემა აქვს. ტრავმირებულები არიან რობერტ ლევანდოვსკი, პედრი და უსმან დემბელე. სამივე ფეხბურთელი ძირითადი შემადგენლობის წევრია და მეტწილად ჩავი ერნანდესს თავისი ტაქტიკა ამ მოთამაშეებზე აქვს აგებული.

რა თქვა ჩავიმ მატჩის წინ?

„რეალმა ბოლო პერიოდში ბევრი ტიტული მოიგო, ჩვენ კი ხელახლა შენების პროცესში ვართ. სუპერ თასზე ისინი ბრწყინვალე ფეხბურთის წყალობით დავამარცხეთ, მაგრამ საუბარი იმ რეალზე გვაქვს, რომელმაც რამდენიმე დღის წინ ლივერპული გაანადგურა. გულახდილები უნდა ვიყოთ და ვთქვათ, რომ ისინი ფავორიტები არიან, მაგრამ მათთვის ზიანის მიყენება შეგვიძლია. ეს უკვე დავამტკიცეთ და შანსი ორივე გუნდს აქვს.

საკადრო პრობლემებიდან გამომდინარე, ახლა უფრო გუნდური თამაში უნდა ვაჩვენოთ, ვიდრე ოდესმე. ბურთის კონტროლი უნდა მოვიპოვოთ, მამაცები ვიყოთ და შეცდომები თავიდან მაქსიმალურად ავირიდოთ. რეალს ძლიერი ფეხბურთელები ჰყავს, რომლებსაც შეუძლიათ, მეტოქის შეცდომებით ისარგებლონ. ხასიათი უნდა ვაჩვენოთ და ისეთი ფეხბურთი ვითამაშოთ, როგორიც სუპერ თასის შეხვედრაში ვანახეთ.

ამ მატჩს ისე ვუდგებით, როგორც რეალთან გასამართ ყველა დაპირისპირებას. რთული მეტოქე გვყავს, მაგრამ ყველაფერი კამპ ნოუზე გადაწყდება. მოედანზე გავალთ, გამარჯვების მოპოვებას შევეცდებით და იმედი მაქვს, ხასიათს ვაჩვენებთ. კიდევ ერთხელ ვიმეორებ, რომ რეალი ფავორიტია, მაგრამ ყველაფერს გავაკეთებთ, რათა კონტროლი ჩვენს ხელთ იყოს“.

წინა მატჩი

„რეალი“ და „ბარსელონა“ უკანასკნელად ერთმანეთს ესპანეთის სუპერ თასის ფინალში შეხვდნენ. გამარჯვება „ბლაუგრანამ“ მოიპოვა. ჩავის შეგირდებმა 3:1 მოიგეს. ბარსას მხრიდან გოლები გავიმ, ლევანდოვსკიმ და პედრიმ გაიტანეს, ხოლო მადრიდელთა მხრიდან თავი ბენზემამ გამოიჩინა.