44 წელი ისტორიული გამარჯვებიდან: „გვითხრა - გთხოვთ, ლივერპულთან დიდი ანგარიშით არ წააგოთო“

ჩემპიონთა თასის გათამაშების 1/16 ფინალის საპასუხო შეხვედრაში, დინამომ  ინგლისის ჩემპიონს, ლივერპულს საკუთარ კედლებში უმასპინძლა და ანგარიშით - 3-0 დაამარცხა. მატჩი 1979 წლის 3 ოქტომბერს გაიმართა და მას შემდეგ ზუსტად 44 წელი გავიდა.

შეხვედრა კოკისპირული წვიმის ფონზე შედგა, თუმცა სტადიონი სრულად გადაიჭედა - მატჩს 90 000 მაყურებელი დაესწრო, რაც დღემდე დასწრების რეკორდია.

გუნდებს შორის პირველი მატჩი 1979 წლის 19 სექტემბერს, ენფილდზე შედგა და მასპინძელთა გამარჯვებით - 2-1 დასრულდა, ხოლო საპასუხო შეხვედრაში, ნოდარ ახალკაცის გუნდმა რევანში აიღო.

თბილისში რეი კლემენსის კარში პირველი გოლი 54-ე წუთზე, ვლადიმერ გუცაევმა გაიტანა. 74-ე წუთზე, ჭილაიას აქტიური თამაშის შემდეგ, რამაზ შენგელიამ ანგარიში ორამდე გაზარდა. მე-80 წუთზე, მატჩის საბოლოო ანგარიში ალექსანდრე ჩივაძემ, პენალტის ნიშნულიდან დააფიქსირა.

აღსანიშნავია, რომ ჩივაძემ კლემენსს ინგლისშიც გაუტანა.

ეს გახლდათ ერთადერთი შემთხვევა, როდესაც მსოფლიოს ერთ-ერთი ყველაზე ტიტულოვანი კლუბი ევროპულ ტურნირებს პირველივე წრეში გამოეთიშა.

თბილისურ შეხვედრაში ნოდარ ახალკაცმა შემდეგი ფეხბურთელები ათამაშა:

ოთარ გაბელია, გოჩა მაჩაიძე, ალექსანდრე ჩივაძე, შოთა ხინჩაგაშვილი, გიორგი ჭილაია, ვიტალი დარასელია, მანუჩარ მაჩაიძე (c), ვახტანგ ქორიძე, ვლადიმერ გუცაევი, დავით ყიფიანი, რამაზ შენგელია;

ბობ პეისლის გუნდის შემადგენლობა ასეთი იყო: 

რეი კლემენსი, ფილ ნილი, რეი კენედი, ფილ თომფსონი (c), ალან ჰანსენი, კოლინ ირვინი, კენი დალგლიში, ჯიმი კეისი (დევიდ ფეირკლაფი 77), დევიდ ჯონსონი, ტერი მაკდერმოტი, გრემ სუნესი;

ლივერპულის დამარცხების შემდეგ, ჩემპიონთა თასის 1/8-ფინალურ ეტაპზე, დინამო გერმანულ ჰამბურგს დაუპირისპირდა, რომლის შემადგენლობაში ფელიქს მაგათი, ჰორსტ ხრუბეში, მანფრედ კალცი და კევინ კიგანი თამაშობდნენ. ჰამბურგმა ორი მატჩის ჯამში 6-3 გაიმარჯვა (3-1/ 2-3).