ტაბატაძის ლელო | უმცროსი ბორჯღალოსნები სამხრეთ აფრიკასთან დამარცხდნენ

საქართველოს 20-წლამდე მორაგბეთა ნაკრებმა მსოფლიო ჩემპიონატის ჯგუფური ეტაპის მეორე შეხვედრა გამართა. უმცროსი ბორჯღალოსნები სამხრეთ აფრიკელ თანატოლებს დაუპირისპირდნენ და 5:33 დამარცხდნენ.

შეხვედრის პირველი ქულები ქართველმა მორაგბეებმა აიღეს. მეხუთე წუთზე, კარგად გათამაშებული შეტევის შემდეგ სამხრეთ აფრიკას ლელო ლუკა ტაბატაძემ დაუდო. გარდასახვა ვერ გამოვიყენეთ და ანგარიში 5:0 დარჩა.

მიღებული ლელოს შემდეგ სამხრეთ აფრიკა გააქტიურდა და 28-ე და 34-ე წუთებზე სიფოსეთუ მნებელელემ ორი ლელო დადო, რომლებიდანაც ერთი გარდასახეს — 12:5. პირველი ტაიმის დამატებულ წუთზე ლევან ეზეიშვილს წითელი ბარათი უჩვენეს და სამხრეთ აფრიკამ რიცხობრივი უპირატესობა მიიღო.

მეორე ნახევარში უმცროსმა „ქურციკებმა“ სამი ლელო დადეს, სამივე გარდასახეს და საბოლოოდ, 33:5 იმარჯვეს.

ცნობისთვის, ორი ტურის შემდეგ საქართველოს ორი ქულა აქვს და სატურნირო ცხრილის მესამე პოზიციას იკავებს. უმცროსი „ბორჯღალოსნები“ ბოლო შეხვედრას ურუგვაის წინააღმდეგ გამართავენ.