ნინიაშვილის მორიგი ლელო - ლა როშელი Challange Cup-ზე გადავიდა

რაგბის ჩემპიონთა თასის მე-4 ტურში, დავით ნინიაშვილისა და ალექსანდრე ქუნთელიას „ლა როშელი“ საკუთარ მოედანზე ინგლისურ „ჰარლიქუინსს“ დაუპირისპირდა და დრამატულ ბრძოლაში 17:27 დამარცხდა.

ქართველებიდან სასტარტო შემადგენლობაში დავით ნინიაშვილი იყო, ქუნთელია კი მოედანზე 71-ე წუთიდან გამოჩნდა. ნინიაშვილმა მე-11 წუთზე მეტოქეს ლელო გაუტანა და ანგარიშიც გახსნა, რასაც მისი თანაგუნდელის მიერ ზუსტად შესრულებული გარდასახვაც მოჰყვა, თუმცა ამის შემდეგ სადავეები ხელში ბრიტანელებმა აიღეს. 33-ე წუთზე საჯარიმო დარტყმით „ჰარლიქუინსმა“ ანგარიში 7:3-მდე შეამცირა, ტაიმის მიწურულს კი ლელოც გაიტანა, რასაც ზუსტი გარდასახვაც მოჰყვა და ინგლისელებმა პირველი ნახევარი 10:7 მოიგეს.

ნინიაშვილის ლელო:

მეორე ტაიმის დებიუტში, 53-ე წუთზე „ჰარლიქუინსმა“ კიდევ ერთი ლელო დადო, რასაც 61-ე და 65-ე წუთებზე „ლა როშელის“ მხრიდან ორი საპასუხო ლელო მოჰყვა. შედეგად, მასპინძლებმა ანგარიშის გათანაბრება შეძლეს, მაგრამ დარჩენილ დროში მეტოქისგან თითო ლელო და საჯარიმო დარტყმა მიიღეს და საბოლოოდ 17:27 დამარცხდნენ.

ამ მატჩის შემდეგ, ჩემპიონთა თასზე ჯგუფური ეტაპი დასრულდა. 4 ტურის შემდეგ, ქართველების გუნდმა 6 ქულით მე-5 პოზიცია დაიკავა და „ჩელენჯ ქაფზე“ გადაინაცვლა. „ლა როშელი“ მე-4 ადგილოსან „ლესტერ თაიგერსს“, რომელმაც ასევე 6 ქულა დააგროვა, ბურთების შეფარდების გამო ჩამორჩა.