ინგლისის ნაკრებმა დაიჩოქა - უემბლი ცისარტყელის ფერებში განათდა
მსოფლიო ჩემპიონატის ჯგუფური ეტაპის მეორე ტურში, ინგლისის ნაკრები აშშ-ს ეროვნულ გუნდს ხვდება. მატჩის დაწყებამდე, „სამი ლომის“ ფეხბურთელებმა საპროტესტო ჟესტს მიმართეს და მუხლი მოიდრიკეს.
როგორც მოგეხსენებათ, ეს რასიზმის წინააღმდეგ მიმართული ქმედებაა და მასში მონაწილეობა ინგლისის ნაკრების ყველა მოთამაშემ მიიღო, აშშ-ს ნაკრების ფეხბურთელებს კი არ დაუჩოქიათ. „სამმა ლომმა“ ეს ჟესტი მეორედ გამოიყენა და მსგავსი რამ ირანთანაც გააკეთა.
რასიზმის წინააღმდეგ მიმართული ჟესტის გარდა, ინგლისელებმა LGBTQ+ თემსაც გამოუცხადეს მხარდაჭერა. შეხვედრის დაწყებამდე რამდენიმე წუთით ადრე, „უემბლის“ თაღი ცისარტყელის ფერებში განათდა. ეს ინგლისის ფეხბურთის ასოციაციის ინიციატივაა, რომელიც მუნდიალზე One Love სამკლავურის ტარების აკრძალვას უკავშირდება.
შეგახსენებთ, რომ FIFA-ში მიიჩნევენ, რომ ეს პოლიტიკური ნაბიჯია და პოლიტიკის ფეხბურთში ჩარევას დაპირისპირების წინაპირობად თვლიან. გერმანიის ფეხბურთის ფედერაცია ამის უპასუხოდ დატოვებას არ აპირებს და სპორტის საარბიტრაჟო სასამართლოში სარჩელის შეტანას გეგმავს.