უზარმაზარი იმედგაცრუება და უპირატესობა ნახევარდაცვაში | მბაპეს შეფასება

მსოფლიო ჩემპიონატის ნახევარფინალში საფრანგეთი ესპანეთს დაუპირისპირდა და პირველი ფინალისტის ვინაობაც ცნობილი გახდა. შეხვედრა ტეხასში გაიმართა, „ფურია როხამ“ „ლე ბლეს“ მრისხანე შეტევა სრულიად გათიშა და დამსახურებულად გაიმარჯვა — 2:0.

კილიან მბაპე ესპანეთთან მარცხით დიდ იმედგაცრუებას გრძნობს.

„ჩვენ არ ჩავატარეთ ისეთი მატჩი, როგორიც გვინდოდა — არც ტაქტიკურად, არც ტექნიკურად და არც იმ ზოგადი დონის თვალსაზრისით, რაც ვაჩვენეთ. როდესაც მსოფლიო ჩემპიონატის ნახევარფინალში იმას არ აკეთებ, რაც უნდა გააკეთო, მაშინ ვერ გაიმარჯვებ. ესპანეთი ერთგული დარჩა თავისი სათამაშო გეგმის, რაც მათ ახასიათებთ: გუნდი, რომელსაც უყვარს ბურთის კონტროლი და ტემპის კარნახი. ჩვენი იდეა იყო, მაღალი პრესინგი გვეთამაშა, რათა თავიდან აგვეცილებინა მათი კომფორტული, „ცრუ“ ტემპი, მაგრამ ეს ვერ შევძელით. ზედმეტად ბევრი ტექნიკური შეცდომა დავუშვით, ვერ მოვახერხეთ მათი დაჩაგვრა, ეს ყველაზე მეტად გვჭირდებოდა.

ჩვენ მივეცით მათ უფლება, თავად ეკარნახათ ტემპი. ჩვენზე იყო დამოკიდებული ძალთა ბალანსის შეცვლა და სწორედ აქ დავმარცხდით. თავიდანვე, იმ პრესინგის მიუხედავად, რასაც ვაკეთებდით, ნახევარდაცვაში ყოველთვის სამი ორის წინააღმდეგ აღმოვჩნდებოდით და ესპანეთის წინააღმდეგ ეს უკვე რთულია. ფაბიან რუისსა და როდრის ბევრი დრო ჰქონდათ ბურთით სათამაშოდ. პრესინგის დროს კომუნიკაცია გვაკლდა. საჭირო იყო კაცი-კაცზე თამაში, რათა ისინი გვეიძულებინა, ჩვენთან ერთად ერბინათ, რადგან ესპანეთი ისეთი გუნდია, რომელსაც ბურთის გარეშე სირბილი არ უყვარს. მაშინაც კი, როცა ბურთს ვიბრუნებდით, ტექნიკურად, პირველი პასები და პირველი შეხებები არ შეესაბამებოდა მსოფლიო ჩემპიონატის ნახევარფინალის დონეს. როცა ამ ყველაფერს ერთად კრებ, შედეგი არის მარცხი.

დიდი იმედგაცრუებაა. ჩვენთვის ოცნება იყო ფინალში გასვლა, ჩვენი ქვეყნისთვის ოცნების შესაძლებლობის მიცემა და ისტორიის შექმნა... ახლა ეს არის ის, რასაც თავაწეულებმა უნდა გავუმკლავდეთ. უზარმაზარი იმედგაცრუებაა; სიტყვებით ვერ გადმოვცემ. დრო გვჭირდება ძალების მოსაკრებად, შვებულებაში წასასვლელად და შემდეგ წინსვლის გასაგრძელებლად. ფეხბურთი არავის ელოდება. წინ სხვა გამოწვევები გველის, როგორც კლუბების, ისე ნაკრების დონეზე“.

ცნობისთვის, ფინალურ შეხვედრაში ესპანეთი არგენტინისა და ინგლისის ნაკრებებს შორის გამარჯვებულს დაუპირისპირდება. მეორე ნახევარფინალი 15 ივლისს, თბილისის დროით, 23:00-დან დაიწყება.