2 ჩატენვა და 7 ქულა | ბითაძის ორლანდომ კლივლენდთან წააგო
გოგა ბითაძის „ორლანდო მეჯიქი“ NBA-ის ახალი რეგულარული სეზონისთვის ემზადება. ფლორიდელებმა პრესეზონის მორიგი შეხვედრა გამართეს და „კლივლენდ კავალიერსთან“ 105:119 დამარცხდნენ.
ქართველმა კალათბურთელმა პარკეტზე 12 წუთი და 24 წამი გაატარა. ბითაძემ 7 ქულა, 2 მოხსნა და 1 ჩაჭრა მიითვალა. გოგამ 3-დან 3 ბურთი ჩააგდო, რომელთაგან ორი ჩატენვა გახლდათ, და 2-დან 1 საჯარიმო სროლა გამოიყენა. მის პასივში ერთი დაკარგვა და ორი პერსონალური ჯარიმა იყო.
„ორლანდოს“ რიგებში ყველაზე მეტი, 17 ქულა ტრისტან და სილვას ჰქონდა. ფრანც ვაგნერმა და პაოლო ბანკერომ მატჩი 10-10 ქულით დაასრულეს. „კლივლენდის“ მხრიდან საუკეთესო ჯეიმს ჰარდენი იყო — 24 ქულა, 4 მოხსნა. დონოვან მიტჩელმა 11 ქულა დააგროვა, NBA-ში დაბრუნებულმა მარიო ჰეზონიამ — 13.
ცნობისთვის, რეგულარული სეზონის დაწყებამდე „ორლანდოს“ კიდევ ორი შეხვედრა ელოდება. 14 ოქტომბერს „მეჯიქი“ „კლივლენდთან“ კიდევ ერთ მატჩს გამართავს, ხოლო 17 ოქტომბერს „მაიამი ჰიტს“ დაუპირისპირდება, რეგულარულს კი „ატლანტა ჰოუქსთან“ საშინაო შეხვედრით გახსნის.
