ძიუდოს ევროპის ჩემპიონატი | წილისყრა და ქართველი ჯუდოკების მეტოქეები

16-19 აპრილს თბილისი ძიუდოს ევროპის ჩემპიონატს უმასპინძლებს. დღეს მოახლოებული ტურნირის წილისყრა გაიმართა და ქართველი ჯუდოკების მეტოქეების ვინაობა გაირკვა.

-60 კგ წონითი კატეგორია
მოქმედი ევროპის ჩემპიონი გიორგი სარდალაშვილი ტიტულის დაცვას მეორე რაუნდიდან დაიწყებს, სადაც ჯეიმს ზაჰრასა და მაქსიმილიან ჰეიდერის გამარჯვებულს დაუპირისპირდება. სარდალაშვილი B ჯგუფში მოხვდა და მეოთხედფინალში მისი სავარაუდო მეტოქეები ჟორე ფერსტრაეტენი (მსოფლიოს მე-11 ნომერი) ან ფრანსისკო გარიგოსი არიან. ნახევარფინალში სარდალაშვილის სავარაუდო მეტოქე ტურნირზე პირველ ნომრად განთესილი, მსოფლიოს მეორე ნომერი ბალაბაი აღაიევია.

-66 კგ წონითი კატეგორია
ვაჟა მარგველაშვილის პირველი მეტოქე ხორვატი დანი კლაჩარი გახლავთ. გამარჯვების შემთხვევაში ვაჟა მსოფლიოს მეშვიდე და ტურნირის მეორე ნომერს, ვალიდე ხიარს დაუპირისპირდება.

-73 კგ წონითი კატეგორია
ლაშა შავდათუაშვილი B ჯგუფში მოხვდა და მისი პირველი მეტოქე ვალტერ ოლინისა და კიპრიანოს ანდრეუს წყვილის გამარჯვებული იქნება. მეოთხედფინალში ლაშას სავარაუდო მეტოქე აკილ გიაკოვა გახლავთ, ნახევარფინალში — ტურნირის ფავორიტი ჟოან-ბენჟამინ გაბა. მიხეილ ბახბახაშვილის პირველი ოპონენტი დანიელ შეგედია; მოგების შემთხვევაში ბახბახაშვილი ჩუსნიდინ კარიმოვს დაუპირისპირდება (მეექვსე ნომერი ტურნირზე). მიხეილი D ჯგუფშია და მეოთხედფინალში პოტენციურ მეტოქედ ლეონარდო ვალერიანი ჰყავს.

-81 კგ წონითი კატეგორია
ტატო გრიგალაშვილი C ჯგუფში დაიწყებს და მეორე რაუნდში მაგამედ ბორჩაშვილს შეხვდება. ტატოს ჯგუფში ეეტუ იჰანამაკი და ჯონ ვრენოზი არიან, ნახევარფინალში ტატოს სავარაუდო მეტოქე ზელიმ ტცკაევია. მატიას კასე და ვედატ ალბაირაკი B ჯგუფში მოხვდნენ, ხოლო ტიმურ არბუზოვი და მიხაილო სვიდრაკი — A ჯგუფში არიან. ასე რომ, შესაძლებელია, ისევ ტატო-არბუზოვის ფინალი მივიღოთ.

-90 კგ წონითი კატეგორია
ლაშა ბექაური A ჯგუფშია და მეორე რაუნდში კენი კომი ბედელს დაუპირისპირდება. მეოთხედფინალში მისი სავარაუდო მეტოქე ბელარუსი იაჰორ ვარაპაიეუ გახლავთ. ნახევარფინალში — ნემანია მაიდოვი ან თეოდოროს ცელიდისი. ლუკა მაისურაძე C ჯგუფშია და ჟარნე დიუკისა და რიმ ფრიდმან-ზილბერშტაინის გამარჯვებულს შეხვდება. მეოთხედფინალში მისი სავარაუდო მეტოქე ადამ კოპეცკი გახლავთ (მსოფლიოს მე-12 ნომერი), ნახევარფინალში კი შესაძლოა მურად ფატიევს (მეხუთე ნომერი) ან მაქსიმე-გაელ ნგაიაპ ჰამბუს შეხვდეს (მეექვსე ნომერი, მე-11 მსოფლიოში).

-100 კგ წონითი კატეგორია
ევროპის მოქმედი ჩემპიონი ილია სულამანიძე ტიტულის დაცვას D ჯგუფში დაიწყებს, სადაც პირველ შეხვედრას ოლივერ ბარატთან გამართავს. მეოთხედფინალში სულამანიძის სავარაუდო მეტოქე რუსი ნიიაზ ბილალოვია (მეექვსე ნომერი, მე-12 მსოფლიოში), ნახევარფინალში მას, ალბათ, ჯენარო პირელი ან ანტონ სავიცკი (მესამე ნომერი მსოფლიოში) დაუპირისპირდებიან.

+100 კგ წონითი კატეგორია
გურამ თუშიშვილი C ჯგუფშია და მეორე რაუნდში იაკივ ხამოსა და იანის ანტონიუს გამარჯვებულს შეხვდება. მეოთხედფინალში მისი სავარაუდო მეტოქე იბრაჰიმ ტატაროღლუა. ნახევარფინალში თუშის, ალბათ, კანან ნასიბოვი ან ვალერი ენდოვიცკი დახვდებიან.

-48 კგ წონითი კატეგორია
ჯულიეტა როდონაია მეორე რაუნდიდან ჩაერთვება და მისი პირველი მეტოქე შირინ ბუკლია, რომელიც IJF-ის რეიტინგში მეორე ნომერია, ევროპის ჩემპიონატზე კი პირველ ნომრად არის განთესილი.

-52 კგ წონითი კატეგორია
ნინო თათრიშვილის პირველი მეტოქე ესტონელი დარია მიხაილოვაა. მეორე რაუნდში გასვლის შემთხვევაში თათრიშვილი როზა გიერტიასს დაუპირისპირდება (მსოფლიოს მეხუთე ნომერი).

-57 კგ წონითი კატეგორია
ეთერ ლიპარტელიანი მეორე რაუნდიდან დაიწყებს და პირველ შეხვედრას ნორვეგიელი ჯუდოკას, ელის ბიორეასის წინააღმდეგ გამართავს. ნინო ლოლაძე ტურნირზე მესამე ნომრად განთესილ ტიმნა ნელსონ-ლევის დაუპირისპირდება.

-63 კგ წონითი კატეგორია
ნინო წიკლაური პირველ რაუნდში 22-ე ნომერს, ნატალია კროპსკას შეხვდება; გამარჯვების შემთხვევაში კი მეორე რაუნდში კარლოტა ავანცატოს დაუპირისპირდება (მე-15 ნომერი, მეშვიდე ამ ტურნირზე).

-70 კგ წონითი კატეგორია
ნინო გულბანის პირველი მეტოქე სამირა დოკი გახლავთ, მარიამ ჭანტურიასი კი — რეიტინგის მეოთხე ნომერი და მოქმედი ევროპის ჩემპიონი შოფი ოზბაში.

+78 კგ წონითი კატეგორია
სოფიო სომხიშვილი მეორე რაუნდიდან დაიწყებს და მისი პირველი მეტოქე მეექვსე ნომერი ჰელენა ვუკოვიჩია.