„შემდეგი მახაჩევი დამარცხდება... ნურმაგომედოვების ჯავშანში ბზარი შეინიშნება...“

UFC-ის ყოფილ მძიმეწონოსანს, ბრენდან შაუბს მიაჩნია, რომ სონგ იადონგთან ბრძოლაში უმარ ნურმაგომედოვის ნოკაუტით სენსაციური მარცხი საბოლოოდ ისლამ მახაჩევის დაცემას გამოიწვევს, რომელიც UFC-ის საჩემპიონო ტიტულს ქვესაშუალო წონაში ფლობს და P4P რეიტინგსაც ლიდერობს.

„მგონია, რომ ამან ნურმაგომედოვების გუნდის ჯავშანში მცირე ბზარი ნამდვილად დაგვანახა. ვფიქრობ, შემდეგი ისლამი იქნება. ვიცი, რომ გიჟურად ჟღერს. ვფიქრობ, ახლა ბიჭებს მათი გუნდის უფრო ნაკლებად შეეშინდებათ, რადგან უკვე იკვეთება გეგმა, თუ როგორ უნდა დაამარცხონ ისინი: მეგობარო, უბრალოდ დაარტყი მას სახეში. საკმარისია თავის შეკავება, არ არის საჭირო მათი ტაქტიკურად დაჯაბნვის მცდელობა“,

- განაცხადა შაუბმა ანალიტიკურ პროგრამაში Big Brown Breakdown.

შაუბის აზრით, დაღესტნელი მებრძოლის დამარცხების ყველაზე დიდი შანსი დაუმარცხებელ ეკვადორელ მაიკლ მორალესს აქვს, რომელსაც ვადამდელი გამარჯვებების მაღალი პროცენტი და საჭიდაო ბაზა გააჩნია.

მიუხედავად ამისა, ისლამ მახაჩევის შემდეგი მეტოქე, დიდი ალბათობით, ბრაზილიელი კარლოს პრატესი იქნება, რომელმაც ჩემპიონთან ოქტაგონი შესაძლოა მიმდინარე წლის ბოლოს ან მომავალი წლის დასაწყისში გაიზიაროს.