მსოფლიო ჩემპიონატის ფავორიტები | რომელ ნაკრებს აქვს საუკეთესო შანსი Opta-ს მიხედვით

მსოფლიო ჩემპიონატის მეოთხედფინალის დაწყებამდე Opta-მ ტურნირის ფავორიტები დაასახელა. ავტორიტეტული სტატისტიკური სააგენტოს მიხედვით, მუნდიალის მოგების ყველაზე კარგი შანსი საფრანგეთის ნაკრებს აქვს — 27.3%.

დიდიე დეშამის გუნდი მეოთხედფინალში მაროკოს ხვდება და Opta-ს მიხედვით, „ლე ბლეს“ მომდევნო ეტაპზე გასვლის 73.9-პროცენტიანი შანსი აქვს. მსოფლიო ჩემპიონატის მეორე ფავორიტი ესპანეთის ნაკრებია — 21.3%. „ფურია როხა“ ბელგიას ეთამაშება და მისი მომდევნო ეტაპზე გასვლის ალბათობა 69.7 პროცენტით ფასდება.

მესამე ადგილზე არგენტინა იმყოფება. „ალბისელესტეს“ ტიტულის ზედიზედ მეორედ მოგების შანსი 17.3 პროცენტია, ნახევარფინალში გასვლის — 69.1%. ინგლისის ნაკრები მეოთხე პოზიციაზე იმყოფება. ტომას ტუხელის გუნდის ჩემპიონობის ალბათობა 16.5 პროცენტია.

„სამი ლომის“ შემდეგ ნორვეგია (6.6%), შვეიცარია (3.8%), მაროკო (3.7%) და ბელგია (3.6%) მოდიან. Opta-ს მიხედვით, ნახევარფინალში გასვლის ყველაზე დაბალი შანსი მაროკოს აქვს — 26.1 პროცენტი.

ცნობისთვის, მსოფლიო ჩემპიონატის პირველი მეოთხედფინალი 10 ივლისს, თბილისის დროით 00:00-ზე დაიწყება და საფრანგეთი მაროკოს დაუპირისპირდება. 23:00-ზე ესპანეთი ბელგიას შეხვდება. 12 ივლისს ნორვეგიისა და ინგლისის, აგრეთვე არგენტინისა და შვეიცარიის ნაკრებების თამაშებს ვიხილავთ.