„ფიფას გადაწყვეტილებით შოკირებული ვართ“ - ბელგიელების განცხადება

ბელგიის სამეფო საფეხბურთო ასოციაცია (RBFA) აშშ-ის ნაკრების ფორვარდის, ფოლარინ ბალოგუნის დისკვალიფიკაციის შეჩერების შესახებ ფიფა-ს გადაწყვეტილებას გამოეხმაურა.

„ბელგიის სამეფო საფეხბურთო ასოციაცია (RBFA) შოკირებულია ფიფა-ს გადაწყვეტილებით, დაუშვას აშშ-ის ნაკრების დისკვალიფიცირებული ფეხბურთელი, ფოლარინ ბალოგუნი აშშ-ბელგიის მატჩში სათამაშოდ.

ფიფა თავის გადაწყვეტილებაში ეყრდნობა (ფიფა-ს სადისციპლინო კოდექსის 27-ე მუხლს). ამ დებულების თანახმად, ფიფა-ს სადისციპლინო კომიტეტს შეუძლია მიიღოს გადაწყვეტილება ადრე დაკისრებული სადისციპლინო სანქციის აღსრულების შეჩერების შესახებ.

თუმცა, იმავე სადისციპლინო კოდექსის 66.4 მუხლი პირდაპირ ითვალისწინებს, რომ წითელი ბარათი (გაძევება) ავტომატურად იწვევს დისკვალიფიკაციას გუნდის მომდევნო მატჩში. ზუსტად ასე გამოიყენებოდა წესი ამ მსოფლიო ჩემპიონატზე გაძევების ყველა წინა შემთხვევაში.

უფრო მეტიც, ზემოაღნიშნულის მიუხედავად, ეს გადაწყვეტილება პირდაპირ ეწინააღმდეგება მსოფლიო ჩემპიონატის რეგლამენტის დებულებებს, კერძოდ 10.5 მუხლს:

„თუ მოთამაშე ან გუნდის ოფიციალური პირი გაძევებულია მოედნიდან პირდაპირი წითელი ბარათის ან მეორე ყვითელი ბარათის შედეგად, რაც ავტომატურად იწვევს გაძევებას, ისინი ავტომატურად ტოვებენ თავიანთი გუნდის მომდევნო მატჩს. გარდა ამისა, მათ მიმართ შეიძლება გამოყენებულ იქნას დამატებითი სადისციპლინო სანქციები“.

ასეთი დისკვალიფიკაციის ავტომატური ხასიათი ასევე პირდაპირ დადასტურდა 2026 წლის მსოფლიო ჩემპიონატის ფიფა-ს №16 ცირკულარში, რომელიც ტურნირის მონაწილე ყველა ეროვნულ ასოციაციას 2026 წლის 12 მაისს გაეგზავნა.

იგივე წესი მეორდება ფიფა-ს ყველა საკოორდინაციო თათბირზე 2026 წლის მსოფლიო ჩემპიონატის მატჩების წინ, და ასევე შეტანილია ტურნირისადმი მიძღვნილ ფიფა-ს ყველა მასალასა და სემინარში.

ტურნირის მონაწილე ყველა გუნდის კანონიერი უფლებების დაცვისა და სამართლიანი თამაშის (Fair Play) ფუნდამენტური პრინციპების შენარჩუნების მიზნით როგორც მიმდინარე, ისე მომავალ მსოფლიო ჩემპიონატებზე, RBFA შემდგომი მოქმედებების ყველა შესაძლო ვარიანტს სწავლობს“,

- RBFA-ს განცხადების ტექსტს სოციალურ ქსელში ცნობილი სპორტული ჟურნალისტი ბენ ჯეიკობსი ავრცელებს.

შეგახსენებთ, რომ ბალოგუნმა ბოსნიასთან მატჩში (2:0), ტარიკ მუჰარემოვიჩის კოჭზე ფეხის დაბიჯების გამო, VAR-ზე გადამოწმების შემდეგ წითელი ბარათი მიიღო და მას ბელგიასთან 1/8-ფინალური დაპირისპირება უნდა გამოეტოვებინა.

მოგვიანებით ბალოგუნის ერთმატჩიანი დისკვალიფიკაცია ერთწლიანი გამოსაცდელი ვადით ჩანაცვლდა. ახლა აშშ-ის ფორვარდი ბელგიის წინააღმდეგ თამაშს შეძლებს.