სენსაცია საქართველოს თასზე - სამგზის ჩემპიონი თასს გამოეთიშა

საქართველოს ერთ-ერთი ყველაზე ტრადიციული კლუბის „ლოკომოტივის“ რეგრესს ბოლო არ უჩანს. ჯერ შარშანდელ სეზონში თბილისის კლუბი Crystalbet ეროვნული საფეხბურთო ლიგა 2-დან მესამე დივიზიონში დაქვეითდა, ახლა კი, დავით ყიფიანის სახელობის თასის მეორე ეტაპზე მოყვარულთა ლიგის ჩემპიონ „ბასასთან“ 1:2 დამარცხდა.

გლდანის საფეხბურთო ცენტრში გამართულ შეხვედრაში „ბასა“ მე-7 წუთზე გიორგი ჯინიკაშვილმა დააწინაურა, რასაც გიორგი ხიდეშელის მომზადებული „ლოკომოტივის“ მხრიდან მე-20 წუთზე ნიკოლოზ ცარციძემ უპასუხა. გამარჯვების გოლი კი, არბიტრის მიერ კომპენსირებულ მეოთხე წუთზე ვერეოვაჟი კლიფ-ნიამ გაიტანა. აქვე გეტყვით, რომ სანამ „ლოკომოტივთან“ სენსაციურ გამარჯვებას მოიპოვებდა, „ბასამ“ თასის წლევანდელი გათამაშება ფოთის „კოლხეთი“ 2-თან გამარჯვებით დაიწყო.

ცნობისათვის, თბილისის „ლოკომოტივი“ საბჭოთა კავშირის დროს საქართველოს ჩემპიონი ორჯერ, 1937 და 1945 წლებში გახდა. დამოუკიდებელი საქართველოს ისტორიაში კი ქვეყნის თასი სამჯერ, 2000, 2002 და 2005 წლებში მოიგო.