ფოფანას უარის შემდეგ - ლიონი მიქაუტაძის გასაყიდად ემზადება

მალიკ ფოფანას ტრანსფერის საკითხის გაჭიანურების ფონზე, „ლიონმა“ გიორგი მიქაუტაძის შესაძლო გაყიდვაზე ფიქრი დაიწყო. თუკი სოლიდური წინადადება იქნება ქართველ ფორვარდს გაყიდიან. მიუხედავად კლუბის ფინანსური მდგომარეობისა, საბოლოო სიტყვა ფეხბურთელს ექნება.

„ლიონს“ დაახლოებით 40 მილიონი ევროს მიღება სჭირდება, რომ ფინანსური პრობლემები მოაგვარონ. ამის ფონზე პირველი გამოსავალი ფეხბურთელების გაყიდვაა და სიაში პირველი ფოფანა იყო, მაგრამ ბელგიელმა ევერტონში გადასვლაზე უარი განაცხადა, რის შემდეგაც მიქაუტაძის ვილიარეალში გაშვება დადგა დღის წესრიგში.

ხუთშაბათს მონაკოში მყოფი „ლიონის“ დელეგაცია „ვილარეალის“ წარმომადგენლებს წინასწარი მოლაპარაკებების ფარგლებში უკვე შეხვდა. ინფორმაციას L’Équipe ავრცელებს. თუმცა, ესპანური კლუბი ერთადერთი კანდიდატი არ არის, ვისაც ჟორჟის შეძენა სურს.

ქართველის დამატება პრემიერლიგურ „ბარნლისაც“ სურს, რომელსაც ფინანსურად საკმაოდ დიდი შესაძლებლობები აქვს, თუმცა ისინი ევროთასებზე არ თამაშობენ და ამ მხრივ „ვილიარეალს“ სერიოზული უპირატესობა აქვს, რადგან ესპანელები ამ სეზონში ჩემპიონთა ლიგაზე იასპარეზებენ.

ნებისმიერ შემთხვევაში, საბოლოო პასუხის თქმა მიქაუტაძეს მოუწევს. იქამდე კი „ლიონმა“ მისი შემცვლელის ძიება უკვე დაიწყო და „ინტერიდან“ ირანელი ფორვარდის მეჰდი ტარემის გადმობირებას გეგმავს.