„ჩვენ წარმატებებს გარე ინვესტორების გარეშე ვაღწევთ - ბაიერნის პასუხი რეალს

“ბაიერნი” და “რეალი” ის კლუბები არიან, რომლებიც უეფას ჩემპიონთა ლიგის გათამაშებაში ყველაზე ხშირად ხვდებიან. მიუნხელებისა და მადრიდელების დაპირისპირება მუდამ დაძაბულობითა და სანახაობრივი ფეხბურთით გამოირჩევა, თუმცა წლევანდელმა ორმატჩიანმა დუელმა ყოველგვარ მოლოდინს გადააჭარბა და ფეხბურთელებმა ისეთი შოუ დადგეს, რომელიც გულშემატკივრებს ძალიან დიდხანს ემახსოვრებათ. სწორედ ამაზე გაამახვილა ყურადღება რეკორდმაისტერის პრეზიდენტმა ჰერბერტ ჰაინერმა Bild-ისთვის მიცემულ ინტერვიუში და სამეფო კლუბზეც საინტერესო კომენტარი გააკეთა:

„ბუნდესლიგის ვერცხლის სინი ჩვენთვის ყოველთვის პრიორიტეტულია, გერმანიის თასი კი ისეა, როგორც ტორტის თავზე ალუბალი. ვეცდებით “შტუტგარტი” დავამარცხოთ და წელსაც ალუბლებიანი ტორტი გვქონდეს. “რეალთან” და პსჟ-სთან ისეთი ფეხბურთი ვაჩვენეთ, რომ არამხოლოდ ჩვენი, არამედ ნეიტრალურად განწყობილი ქომაგებიც ვასიამოვნეთ.

„ბაიერნი” დიდების ზენიტშია და საერთაშორისო სტანდარტებს აწესებს. ჩემმა მადრიდელმა კოლეგამ მითხრა, რომ ერთადერთი კლუბი, რომელსაც “რეალის” გვერდით აყენებს, “ბაიერნია”, თუმცა მის გასაგონად ვიტყვი - ჩვენ წარმატებებს გარე ინვესტორების გარეშე ვაღწევთ”.

ცნობისათვის, რამდენიმე დღეში “ბაიერნს” სეზონის ოქროს დუბლით დასრულების შანსი მიეცემა - 23 მაისს, გერმანიის თასის ფინალში მიუნხენელები “შტუტგარტს” შეხვდებიან და წარმატების შემთხვევაში ამ ტურნირს ოცდამეერთედ მოიგებენ.